Qaahira-(SONNA)-Safaaradda Soomaaliya ee dalka Masar ayaa soo agaasintay munaasab heerkeedu sareeyo oo lagu abaal marinaayey qaar kamid ah howl wadeenadda safaarradda, waxaana munaasabadda oo lagu qabtay xarunta safaaradda ee Qaahira ka soo qeybgalay qeybaha kala duwan ee jaaliyadda Soomaaliyeed ee Masar.
Safiirka Jamhuuriyadda Federaalka Soomaaliya ee dalka Masar ahna wakiilka Joogtadda ah ee Ururka Jaamacadda Carabta Danjire Ilyaas Sheekh Cumar oo furitaanka munaasabada ka hadlay ayaa sheegay in ujeedka munaasabadu ay tahay mid lagu dhiiragalinayo shaqaalaha wasaaradda ee laf-dhabarka u ah howlaha safaaradda sidoo kalena lagu xusayo guulihii ay safaaradda gaartay sanadkii tagay.
Danjire Ilyaas Sheekh Cumar ayaa dhiiraglin iyo dardaaran u jeediyay shaqaalaha lagu abaal mariyay munaasbadda kuwaas oo noqday shaqaalihii ugu shaqada wanaagsana safaaradda ee sanadkii tagay. Waxaan uu tilmaamay in abaal marintaani ujeedkeedu tahay in la sii dardargaliyo shaqada baaxada leh ee safaaradda.
Dhan kale Jaaliyadda Soomaaliyeed ee Masar ku sugnaa munaasabadda ayaa uga mahadceliyay safiirka waxqabadka wanaagsan ee safaaradda uu ku soo kordhiyay, wadashaqeynta iyo xiriirka dhabta ah ee Jaaliyadda kala dhaxeyso.
