Muqdisho,(SONNA):- Jaaliyadda Soomaaliya ee ku nool dalka Sweden ayaa soo dhoweeyay heshiiska difaaca badda ee Dowladda Federaalka ay la gashay dowladda Turkiga.
Guddoomiyaha Jaaliyadda Maxamed Xamdi Sheekh Axmed oo la hadlay warbaahinta qaranka ayaa ugu hambalyeeyay Dowladda iyo shacabka Soomaaliyeed tallaabadii Baarlamaanka ay ku ansixiyeen heshiiska amni iyo dhaqaale ee lala galay Dowladda Turkiga.
” Waxaan halkan hambalyo weyn uga jeedinayaa ummadda Soomaaliyeed meel kasta oo ay joogaan, anigoo maanta ku faraxsan tallaabadii ay qaadeen Baarlamaanka federaalka , xukuumadda Soomaaliyeed iyo madaxweynaha Jamhuuriyadda Federaalka Soomaaliyeed mudane Xasan Sheekh Maxamuud, waxaan maanta anagoo ah jaaliyadda Soomaaliyeed ee dalka Sweden taageereynaa oo garab taagan nahay heshiiskii shalay Baarlamaanka Soomaaliya ansixiya oo ku aaddanaa difaaca Badda iyo bariga dalkeenna,
Dhinaca kale, Soomaaliya ku nool dalka Mareynkanka gaar ahaan gobolka Menasota ayaa soo dhoweeyay heshiiskii amni iyo dhaqaale ee dalkeenna uu la galay waddanku aynu walaalaha nahay ee Turkiga, kaas oo Baarlamaaanka labadiisa Aqal ay shalay ku ansixiyeen ka dib, fadhi ay ku yeesheen magaalada Muqdisho.
Heshiiskan oo socon doona muddo 10-sanno ah, ayaa ku qotoma iskaashiga dhinaca difaaca iyo dhaqaalaha ah, waxayna jaaliyadda Soomaaliyeed ee ku nool Mareykanka ay si weyn u bogaadiyeen tallaabada loo qaaday heshiiskan.
” Tallaabada ay qaadeen madaxdeenna Soomaaliyeed, waa taariikhi, waxay taabaneysaa qof kasta oo Soomaali ah meel kasta uu adduunka ka joogo, waxayna wax tareysaa oo farxad gelineysaa jiilka soo socda oo aynu inagu ka tegi doono, waxayna ka nixisaaa cadowgayaga,” ayay tiri mid ka mid ah haweenka Soomaaliyeed ee ku nool Minnesota.
Sidoo kale, Farxiya Khaliif oo ah wakiilka Galmudug ee waqooyiga Mareynkanka ( North America), ayaa warbaahinta qaranka u sheegtay in ay aad ugu faraxsan yihiin oo ay soo dhoweeynayaan go’aankaas, islamarkaana ay ku bogaadinayaan madaxweynaha tallaabada uu dhanka difaaca Badda u qaaday.
Labada Aqal ee Baarlamaanka Federaalka Soomaaliya ayaa shalay cod aqlabiyad ah ku ansixiyey heshiis ay dowladda Soomaaliya la gashay dhiggeeda dalka Turkiga, kaas oo ku saabsan iskaashiga dhinaca difaaca iyo dhaqaalaha ah.
