Ciidamadii tababarka ugu maqnaa Dalka Eretareeya ayaa qeyb ka mid ah soo gaaray magaalada Muqdisho, waxaana halkii ay ku soo degeen ugu tegay Madaxweynaha Jamhuuriyadda Federaalka Soomaaliya Mudane Xasan Sheekh Maxamuud oo gaaray Xarunta Ciidamada Cirka ee Xoogga Dalka Soomaaliyeed, halkaas oo ay ka socoto dib u soo celinta Ciidamada tababarka ugu maqnaa dalka Ereteriya, wuxuuna Madaxweynaha oo dul istaagay hannaanka dib u soo celinta ciidamada ayaa la dardaarmay cutubyo shalay dib ugu soo laabtay Dalka, waxa uuna la wadaagay rajada iyo hamiga shacabka Soomaaliyeed ay ku qabaan in ay ka qeyb-qaataan cirib-tirka khawaarijta Al-shabaab, isagoo ku bogaadiyey Taliska Ciidamada Xoogga Dalka sida ay u fulinayaan qorshaha qaran ee tayeynta iyo dib u habeynta Ciidamada Xoogga Dalka.
Ciidamada dib ugu soo laabtay dalkooda ayaa ka kooban Dhulka, Cirka iyo Badda, waxayna isugu jiraan qaar sannado badan ku maqnaa Ereteriya iyo cutubyo sannadkan bilowgiisa la diray kuwaas oo soo dhammeystirtay tababarkooda, si degdeg ahna dalkooda loogu soo celiyey, taas oo meesha ka saartay duruufo badan oo soo food saari jiray dhallinyarada u istaagay difaca dalkooda, culeysna ku aheyd waalidkii ay ka tageen iyo qarankoodaba, waxayna dhankooda, Cutubyada soo noqoshadooda uu la kulmay Madaxweynuhu ayaa soo bandhigay tayada iyo tababarka adag ee ay soo qaateen, waxa ayna muujiyeen farxaddooda ku aaddan in loo sii diyaariyey xarummihii ciidan ee ay lahaayeen, saaxiibadii ka soo horeeyey ee dalka soo gaarnay ay ka soo laabteen fasaxyadii, haatanna ay u diyaarsan yihiin gulufkii xoreynta dalka.
Dhinaca kale Madaxweyne Xasan Sheekh ayaa dul istaagay qoddobadda mudnaanta u leh Xukuumadda JFS ayaa hey’adaha dowladda ku adkeeyey in ay xoogga saaraan ciribtirka khawaarijta, dhameystirka dastuurka, deyn cafinta iyo sidii dalkeenna looga qaadi lahaa cuna qabateynta hubka, isagoo sheegay in kobcinta aragtiyaha toolmoon ee dowlad dhiska iyo tayeynta fahamka lagu hoggaaminayo dowladnimada casriga ah ay jaangoyn doonto sidaan uga heshiinno arrimaheenna siyaasadeed, si jiilasha soo socdo loogu horseedo dhabbo cusub oo waxtar u leh mustaqbalkooda.
Madaxweynaha Jamhuuriyadda Federaalka Soomaaliya Mudane Xasan Sheekh Maxamuud oo khudbad dhinacyo badan taabaneyso ka jeediyey shirka khibrad & aqoon Is-weydaarsiga Istaraatijiyadeed ee Golaha Wasiirrada Xukuumadda ayaa tilmaamay ahmiyadda ay leedahay Hannaanka Jiheynta Dowladnimada Casriga ah ee Soomaaliya si looga heshiiyo arrimaha aas aasiga u ah dowlad dhiskeenna.
Beryahaan waxaa soo badanaya barnaamijyo ay Dhallinyarada Gobolka Banaadir ku nool ay ku soo bandhigayaan mashruuc ay ugu magac dareen GUUL ama Geeri, iyadoo shacuurtooda ku soo bandhigayay sida ay diyaarka ugu yihiin ka qebyqaadashada dadaalka ay dowladdu ugu jirto la dagaalanka kooxda khawaarijta ah ee Al-shabaab, waxaana ka qeybqaadanaya Kooxo Fanaaniin ah oo saran gaari lagu soo xardhay sawirada Ciidamada Qaranka.
“MUQDISHO tii hore ma ahan, dhallinyaradaan dareenkooda diidmada Khawaarijta cabiraysana ma ahan kuwo la soo abaabulay ama lacag lagu soo baxshay ee waa kuwo dareenkooda iyo Kacdoonka dalka ka socda ay hagayaan. Tani waa fariin MUQDISHO u dirayso haraadiga Khawaarijta iyo in xasuuqii 14 oktoobar ee arxandarrada ahaa oo kale uusan aheyn Mid si fudud lagu ilaawi karo”, sidaasi waxaa yiri:- Wasiirka Arrimaha Gudaha ee Xukuumadda Federaalka Soomaaliya Mudane Axmed Macallim Fiqi. Wasiirku waxaa kaloo uu hadalkiisa sii raaciyay in Dhallinyarada MUQDISHO fursadda ay heystaan ee ah in ay garab istaagaan dadaalada dawladda Soomaaliya ay ku ciribtirayso Khawaarijta, si loo gaaro xasiloono iyo nabad suurtagalisa in Dhallinyaradu helaan wax badan oo ay hadda tabayaan.
‘Guul ama Geeri’, waa b arnaamij ay soo qabanqaabiyeen Dhallinuayarada ku dhaqan Magaalada Muqdisho, waana xaqiiqada Xamar taalla, waa Dareenka Dadkeenna iyo Dagaalka suulinta Khawaarijta, waxaa isna Bartiisa Mareegta Face Book-ga soo dhigay qoraal uu ku cabirayo waxa hada ka socda Magaalada Muqdisho Wasiir ku xigeenka Waraafinta Cabdiraxmaan Yuusuf Cadaala, wuxuuna qoraalkiisa ku bilaabay ‘ama Khawaarij muuqda ahoow ama Aff iyo Awlaad Khawaarij ahoow ee Waagu waa soo baryay. Waayuhuna waa is badaleen Waqtiguna kuuma wacna. Hadda Dadkeenu waa mid Dabka kor u sita oo idinku gubaya iyo mid Geesigaas garab iyo guubaabo u ah’.
Waxaa kaloo uu Wasiir ku xigeenku qoraalkiisa ku si xusay ‘Shacabkeennna Sharafta badanoow mahadsanidiin, waxa inoo haray waa iska maalmo kooban. Si aan u dhamaystirno suulinta nooc kasta oo Khawaarij iyo Maqaar Khawaarij ahba, waxaan u baahanahay in aan sii xoojino dhiiranaanta, Adkaysiga, isku duubnaanta iyo Alle kaalmaysiga’. ‘Allaah ayaan uga mahdinaynaa baraarugga Bulshadeenna halkaan soo gaarsiiyay. Dhamaanteen aan xusuusnaano in aan Mahad oo dhan u celino Allaah Subxaanahu watacaalla oo guusha iyo garashada ina siiyay, ka dibna aan oogno baryadiisa iyo in uu Nasriga inoo dhamaystiro. Alloow adiga ayay mahad kuu sugnaatay’, ayuu qoraalkiisa ku soo khatimay Mudane Cadaala.
Magaalada Muqdisho ayaa yeelatay muuqaal yididiilo leh, taasi oo ka turjumeysa sida Dadka ku dhaqan ay ugu dhiiradeen in iyagoo aan la abaabul isu soo baxaan, ammaankoodana cidna ay ilaalineyn, kulana kala goosha Waddooyinka Magaalada goor habeen ah, waxaana arrintaasi isna qoraal mareegta Face Book-ga uu ku leeyahay ku qoray Xil. Maxamed Cabdi Xayir Maareeye qoraalkaan, ‘Sidaan hore wax badan u sheegay waxaan aaminsanahay in sida keliya ee Khawaarijta looga cidhib-tiri karo Soomaaliya in ay tahay dedaalka Dawladda oo lagu daro kacdoon shacab. Taariikhda inta la ogyahay ilaa xornimada ka hor, isbedel kasta oo micno leh oo Soomaaliya ka dhacay wuxuu ku yimid kacdoon shacab.
Waxaan amaanayaa kacdoonka Guul ama geeri ee Dhallinyarada reer Muqdisho mar kale ku baaqeen iyo dareenka wadaniyada leh ee Dhallinyarada, Madaxweynaha, Ra’iisul Wasaaraha iyo xubnaha Golaha Wasiiradu dhiigooda ugu deeqeen Ciidanka geesiyaasha ah ee ku soo dhaawacma dagaalka. Waxaan soo Jeedinayaa:- 1. In Kacdoonka Shacabka loo sameeyo qorshe iyo gudiyo ay hogaaminayaan dad aqoon u leh sida loo maamulo kacdoonada Shacabka.
- In dhammaan masuuliyiinta Dawladda sida Golaha Wasiirada, Barlamaanka, Shaqaalaha Dawladda iyo Shacabku jidka maanta la furay raacaan oo dhiigooda ku deeqaan ilaa Ciidanku ka dhaho intaas baa naga badan’.
