Hey’adda Sirdoonka iyo Nabad Sugidda Qaranka ee NISA ayaa shaacisay magacyada iyo Sawirada qaar ka mid ah horjoogeyaashii Khawaarijta ee lagu laayay hawlgalladii ugu dambeeyay oo ay fuliyeen ciidanka Qaranka, geesiyaasha deegaanka iyo Saaxiibada Caalamka. Sirdoonka Soomaaliya waxa uu si dhow ula socday dhaq-dhaqaaqyada iyo xogta horjoogeyaasha hadda la dilay iyo kuwa kale ee wali baxsadka ah, kuna dhuumaalaysanaya dhulka howdka ah.
Xogta horjoogeyaasha la dilay:- 1. Horjooge Sheekh Cabdullaahi waxa uu horjooge u ahaa maleeshiyaad Khawaarij ah ee deegaanka Number 50 ilaa iyo deegaanka Buufow 2. Horjooge Cali Timajilic waxa uu ahaa horjoogaha Caafimaadka ee Maleeshiyaada. 3. Horjooge Bashiir Dheere waxa uu ahaa horjoogaha Khawaarijta ka hawlgasha aagga Buula-mareer. 4. Horjooge Cabdiqafaar oo loo yaqaano macalin Nadaara waxaa uu ahaan qaybta dilalka, ka dib waxaa lagu daray qaybta ay ugu yeeraan jugta culus. 5. Horjooge Shaaciye Maxamed Cali oo loogu yeeri jiray Kufridiid, waxa uu ahaa horjooge dhinaca waxyaabaha qarxa ah. 6. Sakariye Maxamed Bashiir oo loo yaqaanay cadnaan waxa uu ahaa qaybta ay ugu yeeraan jugta culus, iyo kan 7. Horjooge Axmed Cali Daahir Shuuke, hadda waxa uu qayb ka ahaa horjoogeyaal loo xilsaaray in ay kiciyaan bulshada.
Khawaarijta ayaa saaka Miino ay ku qariyeen Ceelkii ugu weynaa magaalada Ceel-garas ee gobalka Galgaduud ayaa waxaa ku dhaawacmay qof ka mid ah dadka deegaanka oo la sheegay in uu dhulka miyiga ah biyo ka soo doontay. Kooxda arxanka daran ee Khawaarijta ayaa ka hor inta aanan lagala wareegin magaalada waxay ku xireen miinooyin dhammaan goobaha muhiimka ah, inkastoo ciidanka dowladdu ay ka saareen Qaraxyo badan oo cadowgu ugu tala galay inuu ku dhagro ciidanka Qaranka iyo dadka deegaanka, iyadoo Ciidanka Xoogga iyo geesiyaasha dadka deegaanka ay maalinkii shanaad ku sugan yihiin magaalada Ceelgaras ee gobalka Galgaduud, waxaana weli socda howlgallo ay ciidamadu ka wadaan magaalada iyo tuulooyinka u dhow dhow.
Dhinaca kale Ciidanka Qaranka iyo saaxiibada caalamka ayaa Gumarka Cosobow Cali oo hoos taga degmada Ruunnirgood ee gobalka Shabeellaha dhexe ayaa lagu dilay ku dhowaad 10 ka tirsan Khawaarijta oo doonayay inay weeraraan geesiyaasha dadka deegaanka ee dagaalka kula jira Khawaarijta ee ku sugan degmadaas, waxaana la soo warinayaa in Gaari NOHA ah oo ay ku rarnaayeen walxaha qarxa iyo hub kale oo aad u farabadan, islamarkaana maleeshiyo aan badneyn ka qaaday degmada Ruunnirgood, ayaa abbaaro 17:25-daqiiqo ah ee shalay waxa lagu duqeeyay deegaan u dhaxeeya Cali Heelle iyo degmada Ruunnirgood, gaar ahaan meel la yiraahdo Gumarti Cosoboow Cali (Cosoboow Dawac-dhageeye) una dhaxeeysa: Leba Aw Xasan iyo Hareeri Culusoow oo ku dhex yaalla waddada xariirisa degmada Ruunnirgood ilaa degmada Gaalkacyo, loona yaqaanno: “Rasta Gaduud”.
Maleeshiyaad aan tiro badneyn oo dhowr qof lagu sheegay, balse aan tiradooda oo go’an la heyn ayaa gaariga saarnaa, iyadoo ujeedka ugu weyn uu ahaa qaraxyo aad u tira badan oo gaariga saarnaa, waxaana la sheegayaa in xilligaas la duqeeyay in halkii lagu duqeeyay ay olol ka baxayay muddo 5 saacadood ka badan. “Cid walba oo xaqa iyo xigtada dhabarka u jeedisa maalin ayaa la soo qaban doonaa, sidaas si la mid ah ayaana loo ciqaabi doonaa. Waa shar iyo halis ummadda kusoo wajahneyd oo laga hortegay Alle ayaana ku mahadsan oo dhagartoodii iyaga ku naqay”, sidaasi waxaa yiri Odey ka soo jeeda Deegaanka Ruunnirgood.
Inta la arkay, haddii uu jiro hal qof oo uu dagaalka daacad ka yahay waa isaga, waxaan ku farxay in 2 sano uu joogo furin dagaal, kana soo tagay reerkiisa, gurigiisa iyo magaaladiisa, isagoo aysan jirin qof u og ama wax ku siisa waxa uuna wataa dhallinyaro isaga la mid ah oo caqiido ahaan ula dagaalsan Khawaarijta Al-Shabaab. Qofka aan ka hadlayaa waa Cumar Macallin Nuur Maxamed Siyaad, ma’ahan Sarkaal dowladeed iyo askari midna oo wax mushaar ah kama helo Dowladda, kumana jiro diiwaanka dowladda, wax ka badan 10 sano ayuu ku jiraa dagaalka Al-Shabaab, Muqdisho ilaa Cowsweyne, isagoo waligiis ku tashan mushaar, darajo ama wax kale.
Waxaa marag ma doonta ah in Wiil dhallinyaro ah ee halgankaas adag galay isagoo aan sharuud ku xirin in uusan ku tashan xuquuq iyo darajo hadana dowladda oo og aysan u garan halkii ay aheyd in ay abaal mariso, waxaa uu doonayaa inuu u helo garab iyo taageero dowladeed, si uu degaankiisa u tago, deegaannada uu ka soo jeedo ayaa ah Masagawaa, Galcad iyo Ceeldheer, waxaana haatan abaabul weyn loogu jiraa sidaa dib loogu laaban lahaa Deegaannadaasi, waana ku sii siqayaan Ciidamada Dowladda iyo kuwa Deegaanka.
khaliif Cumar Macalim nuur maxamad siyaad waxa uu naf iyo maalba u huray difaaca diinta, dalka iyo dadka wuxuuna mudan yahay ku dayasho, Qof doortay dagaal iyo rafaadka furimaha ka jira sharuudna aan ku xirin, wax dan ah oo ka soo galeysana aysan jirin oo aan ka aheyn ciribtirka kooxda Maafiyada ah ee Al-Shabaab, ma jiro ama ugu yaraan waa yar tahay. Allaha ha xafido Khaliif Cumar Macallin Nuur. “Khawaarijtu waxay suuliyeen dhaqankii Islaamka, waxayna dumiyeen goobihii Diinta lagu faafin jiray”, ayaa laga hayaa inuu yiri Cumar mar uu ka dhex hadlaayay Magaalada Meagawaa, dhowr bil ka hor.
