Abaabulkii ugu dambeeyay ee ku aadan dib u xoreynta Deegaananada ay wali kaga harsan yihii Gobolka Galguduud ayaa waxaa haddana soo baxaya in Kooxda Khawaarijtu ay talo ku caddaatay ayna heysato laba daran mid dooro, waxayna sii kordhiyeen cadaadiskii ay ku hayeen Dadka ku dhaqan deegaannadaasi, iyagoo bilaabay inay ka qaadaan Xoolo baad ah, ku qasbid inay u dagaalamaan iyo dil u geysasho ciddii diidda amarkooda, iyadoo la soo sheegayo inay Deegaanka Cowsweyne ee Degmada Ceeldheer ay ku dileen Gabar, halka Odey waayeel ahna ku dhaawaceen, kadib markii ay diideen Amarkooda.
Wararka laga helayo deegaanka Coosweyne ee hoos taga degmada Ceeldheer iyo degannada u dhow in ay dadka Shacabka ah ay ku amreen in maanta oo Axad ah ay isaga soo baxaan halkaasi, si looga dhigo in ay taageersan yihiin khawaarijta, waxaa kaloo jirta in odayaasha deegaanka ay u qeybiyeen Hub, kadibna ay isku sawiraan, iyadoo dadka deegaanka oo ka hor yimid arrintaasi ay khawaarijtu dil u geysteen qof Dumar ah, halka mid kalana ay dhaawaceen, waxaana haadtan kacsan xaaladda Deegaanaka Cowsweyne, arrintan ayaa ka dambeysay kadib markii kooxda Khawaarijta u arkaya Gulufka colaadeed ee ku soo wajahan ayay dadka shacabka ee ku nool deegaannada ay ku sugan yihiin ku amrayo in ay dagaalamaan, balsa shacabka oo ku baraarugsan dhagarta kooxda ayaa diiday in caruurtooda iyo iyaga laftooda ay ka bar-bar dagaalamaan khawaarijta.
Maxamed Xasan Xaad oo ka mid ah Nabadoonnada Galmudug oo ka hadlaayay halganka loogu jiro dib u xoreynta Deegaannada Ceelbuur iyo Galhareeri iyo kuwa ku xeeran ayaa sheegay inuu qeyb ka yahay halgankaasi, ” anigoo Da’ ah ayaan waxaan ballan qaadayaa in aan Magaalada Muqdisho dib ugu laaban doonin ilaa aan ka xoreeyo Deegaananada aan ka soo jeedo ama aan ku dhinto, Madaxweynaha Dalka ayaanba Muqdisho iyo xafiiskiisa ku laaban doonin ilaa uu hubiyo xoreynta Magaalooyinkaasi, marka aniga maxaa ii diidaya in aan go’aankaasi qaato”, sidaasi waxaa yiri Nabadoonka.
Khawaarijta ayaa Gobolka Galguduud ka sugan laba degmo oo kala ah Ceelbuur iyo Galhareeri, waxaana ku soo wajahan weerar 4 jiho ah, marka maxaa la gudboon?, “Haraadiga Khawaarijta Galmudug ku harey 2 waddo Midkood un baa u furan; is-dhiibid ama is-daldalid. Calanka Qaranka mar dhow dhul ballaaran ayaa laga taagi doonaa, Insha Allaah. Afkhawaarijna waa la arkay”, sidaasi waxaa yiri Cabdulqaadir Maxasmed Nuur Jaamac Wasiirka Gashaandhigga Xukuumadda Federaalka Soomaaliya.
Haddaba Af-khawaarij muxuu sharcigu ka qabaa ama xukunkiisu yahay? Wax ka baro Qodobka ka mid ah Xeerka Ciqaabta Soomaaliya.Qodobka 208.
Jebin siyaasadeed.
- Qofkasta oo wakhti dagaal fidiya ama xiriiriya been, buunbuuniya ama fidiya marin habaabin ama war, kaas oo abuuri kara argagax shacbi ama niyad jab, ama haddii kale yaraynaya adkaysiga ummadda ee cadowga, ama wax kasta oo kale sameeya wax dhaawacaya danta ummadda waxaa lagu ciqaabayaa xarig aan ka yarayn shan sanno;
- Ciqaabtu waxay noqonaysaa xarig aan ka yarayn shan iyo toban sanno (15):
- Marka falka lagu galay hab dacaayadeed ama is gaadhsiin lagu hagaajinayay askarta.
- Marka falka la galay yahay natiijo sirdoon cadaw.
Wasiir Fiqi “Sida Al Shabaaab oo kale Dad u dhaqma ayaa jira oo soo dhiga askriga la dila meel walba baraha bulshada ayeyna ka qeel-qeeliyaan waxaana naga go’an in aan kuwaaasi gacan saarno “, sidaasi waxaa yiri:- Wasiirka Arrimaha Gudaha ee Xukuumadda Feseraalka Soomaaliya mudane Axmed Macallim Fiqi.
Dhinaca kale Ciidanka Qaranka oo kaashanaya saaxiibada Caalamka ayaa howlgal qorshaysan ka fuliyay deegaannada Baladul-Amiin iyo Baladul-Kariim oo ka tirsan gobalka Shabeellada Hoose, kadib markii la helay xog ku saabsan in maleeshiyaad Khawaarij ah ay si dhuumaalaysi ah isugu aruursanayaan beero ku yaalla deegaanadaas.
Faahfaahin hordhac ah ayaa ka soo baxaya dagaal culus oo ka dhacay deegaanka Basra oo ku yaalla inta u dhaxeysa Degmooyinka Afgooye iyo Balcad ee gobolada Shabeellaha Hoose iyo Shabeellaha Dhexe, kaasoo dhaxmaray ciidamada Dowladda iyo kuwa kooxda Argagixisada ah ee Al-shabaab, iyadoo wararka ay sheegay in dirirtaan ayaa soo baxday kadib markii Maleeshiyaad ka tirsan kooxda Argagixisada ay weerareen fariisin Ciidamada Dowladda ay ku leeyihiin deegaanka Basra, Dagaalka ayaa Dadka degaanku ku sheegeen inuu ahaa mid aad u xoogan oo labada dhinac ay isku adeegsadeen hubka noocyadiisa kala duwan,
Saraakiil ka tirsan Ciidamada Dowladda oo la hadlay warbaahinta waxay sheegeen inay iska difaaceen weerarka kaga yimid kooxda Argagixisada, islamarkaana ay khasaaro gaarsiiyeen, ayna ku dileen 18 dhagarqabe oo ka tirsanaa Khawaarijta howlgalkaan sida saraakiil ka tirsan ciidanka ay u xaqiijiyeen Warbaahinta Qaranka, waxayna intaasi ku dareen in goobaha laga sameeyay howlgallada waxaa hadda ku sugan ciidanka Qaranka, kuwaasi oo ku daba jooga firxadkii Khawaarijta.
Dhinaca kale, Madaxweynaha Jamhuuriyadda Federaalka Soomaaliya Mudane Dr: Xasan Sheekh Maxamuud ayaa Madaxtooyada Galmudug ee Dhuusamareeb kula kulmay Ergeyga Gaarka ah ee Qaramada Midoobay u qaabilsan Soomaaliya Marwo Catriona Laing, waxayna Ergeyga ka wada hadleen qorshaha xasilinta ee degaannada laga xoreeyay Argagixisada iyo sidii addeegyada aasaasiga ah loo gaarsiin lahaa bulshada sannadaha badan ku noolaa gaboollada Argagixisada iyo xaaladaha binu aaddannimo ee adag, isagoo la wadaagay Wakiilka Qaramada Midoobay miro-dhalka howlgalada ka dhanka ah Argagixisada Al-Shabaab, isagoo sheegay in ololaha lagu ciribtirayo Argagixisada uu si habsami leh uga socdo degaannada Galmudug, kaasi oo hadafkiisu yahay in laga sifeeyo degaannada ay wali ku harsan yihiin.
Dhankeeda, Ergeyga Gaarka ah ee Qaramada u qaabilsan Soomaaliya Marwo Catriona Laing ayaa bogaadisay sida ay dowladda iyo Shacabka Soomaaliyeed uga go’an tahay cirib-tirka Argagixisada, waxa ayna tilmaantay in joogitaanka Madaxweyne Xasan Sheekh ee Galmudug ay ka dhigan tahay farriin xoojinaysa halganka xoreynta Soomaaliya iyo sidii la isugu furi lahaa deegaannada ay kala xirtay Argagixisadu, kana soo maleegto qaraxyada iyo falalka xasuuqa ah ee ka dhan ah shacabka Soomaaliyeed.
