Washington(SONNA):-Dowladda Maraykana ayaa soo saartay liiska xubno ay u aqoonsatay argagixiso caalami ah.
Waaxda Arrimaha Dibedda Maraykanka ayaa warbixin ay soo saartay waxay shan xubnood ugu aqoonsatay argagixiso caalami ah, waxayna sheegtay in ay xiriir la leeyihiin kooxda Al-qaacida, iyadoo loo cuskaday tirsiga (E.O.) 13224.
Liiska xubnaha iyo shaqooyinka ay kooxaha khawaarijta u qaabilsanaayeen ayaa waxay kala yihiin sida warbixinta hoose lagu xusay;
1: Maxamed Siidow ayaa lagu sheegay in uu yahay horjoogaha maaliyadda iyo Horjooge ciidanka Sirdoonka oo ka tirsan kooxda khawarijta Al-shabaab, isagoo u qaabilsan deegaanka Caliyow Barrow oo ka tirsan gobolka Shabeellaha hoose,.sidoo kale wuxuu ka qayb qaatay qorshaynta iyo fulinta weeraro loo adeegsaday qaraxyo.
2: Cali Yare ayaa isagana lagu sheegay horjooge maaliyadeed oo kooxda khawaarijta Al-shabaab u qaabilsanaa soo ururinta lacagaha baadda ah ee ay ka qaadaan deegaanka tuulada Beled Aamin ee gobolka shabeellaha hoose. Ninkan ayaa wuxuu sidoo kale amri jiray jaangoynta lacagaha baadda ah ee laga qaado oday dhaqameedka deegaanka sidoo kale wuxuu wax ka abaabulay weeraro ka dhacay deegaanka Calaagacad oo ka tirsan Shabeellaha hoose November 2018.
3:Saleebaan Cabdi Daa’uud waa horjoogaha deegaanka Beled Aamin ugu magacaaban kooxda khawaarijta in uu yahay guddoomiyaha degmada sidoo kale wuxuu qayb ka yahay maamulka Maxkamad beenaadka uga hawlgala deegaanka, hore wuxuu uga tirsanaa garabka khawaarijta ee xog ururinta.
4: Maxamed Cumar Maxamed waa horjoogaha kooxda khawaarijta Al-shabaab ugu magacaaban degmada Diinsoor ee gobolka Baay,wuxuu masuul ka ahaa weeraro lagu qaaday shacabka degmada ku nool sidoo kale wuxuu hore u ahaa horjoogaha waxay ugu yeeraan jabhada eedegmada Berdaale gobolka Baay.
5: Maxamed Daa’uud Gaabane waa horjoogaha kooxda Khawarijta Al-shabaab ugu magacaaban horjoogaha Maaliyadda ee degmada Wanlaweyn ee gobolka Shabeellaha hoose.
Dhinaca kale warbixin kale oo ay soo saartay Xafiiska Mareykanka u qaabilsan koontaroolka Hantida shisheeye Waaxda lacagaha ayaa sidoo kale xayiraad ku soo rogtay 21 qof oo lagu eedeeyay inay xiriir la leeyihiin kooxda Al Shabaab, iyadoo sidoo kale xayiraad ku soo rogtay todobo shirkadood oo ganacsi.
