Muqdisho.(SONNA):- Guddoomiyaha golaha shacabka ee Baarlamaanka Jamhuuriyadda Federaalka Soomaaliya Mudane Sheekh Aadan Maxamed Nuur (Madoobe) ayaa ka hadlay ahmiyadda ay waxbasrahada u leedahay Bulshada, qeyb muhiim ahna ka qaadato koritaanka iyo horumarka Bulshada.
Guddoomiyaha ayaa sheegay in ilmaha is qarxinaayo ee sida qaldan loogu fasiray Diinteenna Suuban, ciyaal weerada dhibaatada ku haya shacabka ku dhaqan magaalada Muqdisho iyo kuwa jidadka taagan ee Koolada (Xabagta) dhuuqaya ay aqoontu ku yar tahay loogana baahan yahay in wasaaradda waxbarashada aad u hubiso Manhajka waxbarashada dalka.
“ Ilmahan hadda isqarxinaya inta been loo sheegay, Diinta lagu qiyaameeyay, aqoontoodana yar tahay naftooda in ay haligaan oo isqarxiyaan gaaray aqoontaa ku yar, kuwa hadda la sheegaayo ee ciyaal weerada loo bixiyay oo dadka nafta u keenay aqoontaa ku yar, kuwa jidadka dhooban oo koolada (Xabagta) dhuuqa sidaas oo kale, dhinaac inaan xoogga saaro, wasaaradda waxaan u soo jeedinayaa in Manhajka waxbarashada dalka aad loo hubiyo”.
Sidoo kale, guddoomiyaha golaha shacabka ayaa ugu baaqay waalidiinta in ay ka warqabaan carruurtooda lana socdaan dhaq dhaqaaqooda si aanay ugu dhicin gacanta cadowga ka been sheegaya Diinteenna Islaamka ee gaaray in ay haligaan naftooda isna qarxiyaan.
Guddoomiyaha Golaha Shacabka Baarlamaanka Jamhuuriyadda Federaalka Soomaaliya Mudane Sheekh Aadan Maxamed Nuur (Madoobe) ayaa hadalkan ka jeediyay xafladda soo xiritaanka Shirweynaha Waxbarashada Qaranka oo lagu soo gunnaanaday Muqdisho.
