Muqdisho(SONNA):-Khawaariij burburinta goobaha cibaadada waxa u dheeraa in ay baad ka qaadan jireen.
Kooxda naxariista daran kana been abuurata diinta Islaamka ayaa deegaanadii laga xoreeyey oo ay booqatay warbaahinta qaranku waxay kula soo kulantay dhacdooyin yaab iyo naxdin leh kuwaas oo muujinaya sida kooxda khawaariijtu uga fog tahay diinta Islaamka isla markaana u burburinaysay raadadka diinta islaamka,goobaha cibaadadda iyo culimaa’udiinka oo ay dhamaantood ka erisay deegaanada.
Deegaanka Ceel-muluq oo ka tirsan degmada Aadan yabaal ee gobolka Shabeellaha dhexe waxay ka mid tahay goobaha kooxda khawaariijtu ka geystay tacadiyada ba’an ee ka dhanka ah diinta Islaamka,deegaankan ayey shacabka ku nool isku dayeen in ay dhistaan masaajid balse kooxda khawaariijta ah ayaa ku xukuntay lacagta masaajidka lagu dhisayo mid le’eg in dadku bixiyaan hadii kale aan la dhisi karin,tani waxay cadayn u tahay in kooxdo ka hor tegaysay dhismaha masaajidka si ay u joojiso na culays dhaqaale u saartay dadka deegaanka.
Kooxda khawaariijtu waxay sidoo kale amartay mushaharka ay qaataan shaqaalaha dhisaya masaajidku mid le’eg in loo qoro horjoogayaasheeda ka hawlgala deegaanka iyo budhcada u qaabilsan fulinta dhagaraha ka dhanka ahaa dadka deegaanka Ceel-muluq.
Mid ka mid ah dadka ku nool deegaanka Ceel-muluq oo la hadlay warbaahinta qaranka ayaa sheegay in kooxdu dhibaato daran oo diin la dirir ah kula kacday dadka deegaanka” macallinmiintii ayey buriyeen,ilmihii ayey dugsiyadda ka wateen,masaajidkana waxay kusoo rogeen in laga siiyo lacag baad ah”ayuu yiri.
Markale isagoo la hadlaya warbaahinta qaranka waxa uu sheegay muwaadinkan” waxay nagu khasbeen in aan baad bixino,waxay nagu khasbeen in aan maleeshiyaadkooda cunto u karino, waxay noogu hanjabeen hadii sidaas samayn wayno in qoortayada u maqan tahay”sidaas waxa warbaahinta qaranka u sheegay mid ka mid ah dadka ku nool deegaanka Ceel-muluq.
In goob cibaado oo masaajid ah lacag baad ah laga qaato waa astaan muujinaysa sida kooxda khawaariijtu cadow ugu tahay diinta Islaamka,kooxdan ayaa ku caan baxday maleegida ficillada foosha xun ee ay ku beegsanayso burburinta goobaha cibaadada.
Deegaanka Ceel-muluq hadda ma leh goobo caafimaad sidoo kale waxa ka maqan goobihii waxbarashadda oo kooxda khawaariijtu xirtay qaarna dumisay,waxa sidoo kale deegaank ay ka erisay kooxda khawaariijtu culimadii iyo macallimiintii dugsiyadda quraanka dhigi jiray.
Hore ayey warbaahinta qaranku u baahisay deegaano tiro badan oo kooxda khawaariijtu kala dagaalantay goobaha cibaadada kuwaas oo ay ka mid tahay deegaanka Ceeldheer.
Kooxda Khawaarijta Al-shabaab ayaa bur buriyay Masaajid Jaamicii degmada Ceel-dheer ee gobolka Galgaduud, halkaas oo ay muddo badan gacanta ku hayeen.
Burburinta masaajidka ayaa loo sababeeyey in kooxdu doonayso inaysan sii socon xalaqooyinka diiniga ah ee halkaas laga aqrin jiray, kuwaas oo dadka ka hor keenaya hadii ay fahmaan diinta Islaamka ee saxda ah.
Deegaan walba oo laga saaray Khawaarijta sida Masaajid Cali-guduud iyo Masagawaa ayaa lagu arkay in masaajidda la burburiyey waqti hore oo ah muddada ay deegaanka caburinta ku hayeen lagu tukan.
