Muqdisho.(SONNA):- Ku-xigeenka Ergayga gaarka ah ee Qaramada Midoobay u qaabilsan arrimaha Soomaaliya Kiki Gbeho oo ka hadashay kulanka golaha ammaanka ee Qaramada Midoobay ayaa sheegtay in Dowladda Soomaaliya horumar la taaban karo ay ka sameysay ku guuleysiga arrimaha muhiimka u ah qaranka.
“Dowladda DFS in kasta oo ay caqabado badan jireen, haddana waxay ka sameysay horumar la taaban karo, joogteynta wadashaqeyn dhow oo ay la yeelatay dowladaha Xubnaha ka ah Federaalka, guulo laga gaaray dagaalka lagula jiro Al-Shabaab, iyo Soomaaliya oo weli ku socota wadadii lagu dhammeystiri lahaa hannaanka deyn cafinta ee 2024.” Ayey tiri Kiki Gbeho.
Sidoo kale, Mrs. Kiki Gbeho, ayaa tilmaantay in horumarka ay sameysay dowladda federaalka uu abuuray jawi wax ku ool ah oo suurtageliyay ajendaha dowlad-dhisidda, udub-dhexaadka dhammeystirka geeddi-socodka dib-u-eegista dastuurka iyo guulaha wax ku oolka ah ee laga gaaray dagaalka ka dhanka ah Khawaarijta.
“Horumarka ay samaysay DFS,waxa uu abuuray jawi wax ku ool ah si loo suurtageliyo horumar laga gaaro ku sii socoshada ajendaha dowlad-dhisidda. Udub-dhexaadka ajanduhu waa dhammeystirka geeddi-socodka dib-u-eegista dastuurka loo dhan yahay, la iskuna raacsanyahay,” ayey Kiki Gbeho ka sheegtay Shirka Golaha Ammaanka.
