Muqdisho (SONNA)- Shirka xoojinta iyo iskaashiga Wasaaradaha Ganacsiga iyo Warshadaha heer Federaal iyo heer Maamul Goballeed ee Soomaaliya oo uu maanta furay Wasiirka Ganacsiga iyo Warshadaha Xukuumadda Federaalka Soomaaliya Mudane Khaliif Cabdi Cumar ayaa lagu falan-qeeyeeay mashaariicda iyo shaqooyinka socda ee lagu horumarinayo ganacsiga Soomaaliya iyo sidoo kale dedaalada Wasaaradda Ganacsiga iyo Warshadaha heer Federaal ee ay suuqyo ganacsi oo caalami ah ugu raadinayso wax-soo-saarka dalka, shuruucda, siyaasadaha iyo ku biiritaanka urur ganacsiyeedyada gobalka iyo kuwa caalamka.
Wasiirada Ganacsiga ee Maamula Goboleedyada ayaa dhankooda soo dhaweeyay shirkan oo ay ku tilmaameyn mid muhiim ah, waxayna dhinaca kale xuseen inay xoojin doonaan wada shaqeynta si loo horumariyo ganacsiga dalka.
Shirkan oo socon doona muddo laba maalmood ah, waxaana sidoo kale ka soo qeyb-galay Agaasimaha Guud ee Wasaaradda Mudane Cabdicasiis Ibraahim Aadan, mas’uuliyiin ka socda Wasaaradda Ganacsiga ee heer Federaal, Wasiirada iyo Agaasimeyaasha guud ee Wasaaradaha Ganacsiga Dawlad Goballeedyada Jubbaland, Galmudug, Hirshabeelle iyo Koonfurgalbeed.
