Muqdisho (SONNA)-Wasiirka Warfaafinta, Dhaqanka iyo Dalxiiska ee Xukuumadda Federaalka Soomaaliya mudane Cismaan Abuukar Dubbe ayaa kulan mahadcelin ah u sameeyay Ergadii u soo dooratay kursiga Golaha Aqalka Sare ee Baarlamaanka 11aad ee dalka.
Kulanka oo lagu qabtay Muqdisho ayaa waxaa ka qeyb galay qeybaha bulshada iyo ergadii soo dooratay Wasiir Dubbe, halkaasi oo looga sheekeeyay taariikhda Wasiirka iyo halganka uu ugu jiro midnimada Soomaaliya.
Qaar ak mid ah dhallinyaro ku hadlaysay magaca ergada ayaa uga Mahadceliyay Wasiirka Warfaafinta, ahna Senator ka tirsan Golaha Aqalka Sare, kulanka dhiiri gelinta ah ee uu u sameeyay, iyagoo balan qaaday inay isbadal badan ku sameyn doonaan kuraasta golaha shacabka ee la qorsheynayo in doorashadoodu ay ka dhacdo Muqdisho.
Wasiirka Warfaafinta, Dhaqanka iyo Dalxiiska ee Xukuumadda Federaalka Soomaaliya ahna Senator ka tirsan Golaha Aqalka Sare ayaa balan qaaday in uu si cadaalad ah ugu adeegi doono bulshada uu matalo iyo guud ahaan Ummadda Soomaaliyeed, isla markaana uga mahadceliyay sida ay u ajiibeen kulanka, ayna jiri doonto xaflad intaa ka weyn oo uu Wasiirka u qaban doono Ergada.
