Cadaado (SONNA)- Ayaxa oo dhawr mar la tagay daaqii xoolaha iyo jiidaalka oo daba dheeraaday ayaa nolosha reer miyiga xilligan ka dhigtay mid adag.
Cabdiwali Maxamed samatar oo ka mid ah dadka Geela dhaqda ee deegaanka Kalabayar ee woqooyiga Cadaado ayaa SONNA u sheegay inay Geela biyo iyo raashin ku siiyaan guryaha, maadaama dhirta uusan ka helin daaq ku filan, taas oo tusaale ka bixinaysa heerka ay gaar-siisantahay abaartu.
“Waxaan geela siinaa Galey oo Kiishkii yahay $26, waa nagu adkaatay, waqtigii oo nagu dheeraaday iyo roobkii oo soo daahay ayaa na haysta” ayuu yiri Cabdiwali.
Reer miyiga qaar ayaa waxaa jiidaalka dabada dheeraaday u wehliya cuduro xoolaha uga dhacay, taas oo yaraysay nacfigii xoolaha cad iyo caanaba.
Dr. Nuur Xuseen Ducaale ayaa SONNA u sheegay in cudurada xoolaha ee xilligan ka jira gobolka Galgaduud ay ka mid yihiin Sambabka Ariga ku dhaca, Gooryaanada iyo cudurada ka dhasha dhamiijada, Geelana uu qabo Dhugato.
Xooluhu waa isha kali ah ee ay reer guuraagu dhaqaale ahaan ku tiirsanyihiin, xiligana waxaa dhif iyo naadir noqday neef cayilan oo ay suuqa wax ka gayn karaan, waxaana suuqa xoolaha lagu iibiyo aad ugu yaraaday xoolaha Miyiga, taas badalkeena waxaa suuqa lagu iibinayaa Xoolaha magaalada lagu xanaaneeyo, sida uu SONNA u sheegay Cali Cismaan oo ka mid ah dalaaleyda Suuqa.
Dr Nuur ayaa xoolo dhaqatada oo aan helin dawayn ku filan xoolaha u jeediyey talooyin caafimaad oo wax ka taraya cudurada xoolaha haya, taas oo ay ka mid tahay inay aasaan xoolaha baqtiyey, kuwa jirana ay ka soocaan xoolaha inta ay ka raysanayaan, sidoo kalena ay ka faa’iideystaan tallaalka xoolaha xilligan gobolka ka socda.
