Wararka naga soo gaaraya gobolka Shabeellaha Dhexe ayaa sheegay in saacadihii lasoo dhaafay ay soo korortay cabsi laga qabo in fatahaadda wabiga Shabeelle uu Go’doomiyo isku socodka wadada isku xirta magaalooyinka Jowhar iyo Muqdisho.
Arrintaa ayaa loo sababaneynayaan kaddib markii biyaha wabiga Shabeelle ay si xowli ah usocdaan iyo sidoo kale roobka maalmahaan ka da’ayay Gobolka.
Weriyaheyna inooga soo waramaya magaalada Jowhar Cabdiraxmaan Xuseen Cumar Wadani ayaa sheegay in bulshada ay hadal hayaan sida xaalku noqonayo mar hadii fatahaaddu ay soo gaarsto wadada hal bowlaha u ah isku socoda Jowhar iyo Muqdisho oo hore dhibaatooyin kale ee argagixisada -Al-Shabaab ay wajahayeen.
“Guud ahaan dadka ku nool gobolka gaar ahaan magaaladda Jowhar ayaa kuu sheegaya waxa ka dhallan kara fatahaadda wabiga Shabeelle uu ka qeystay deegaannobadan oo dadkii deganaa ay ka barakaceen kuwaasi oo haatan go’doon ku ah goobo aan munaasab ku aheyn ,haase ahaatee cabsi waxaa sii kordhinaya wadada isku xirta Jowhar iyo Muqdisho ayuu ku daray Weriye Cabdiraxmaan wadani.
Fatahaadda Wabiga Shabeelle ayaa hore ugooyay isku socodka maalooyinka Mahadaay iyo Jowhar oo hada dadka deegaanadaasi ay ku adagtahay inay isaga kala gooshaan.
Dhinaca kale maamulka gobolka Shabeellaha Dhexe ,kan Degmada Jowhar,madaxda Hirshabeelle iyo qeybaha kala duwan ee bulshada ayaa waxa ay ka digayeen fatahaad uu wabiga Shabeelle ka geysto wadada isku xirta Jowhar iyo muqdisho maadaama uu hada uu kawado deegaanno ka akdhaw Degmada Balcad ee Gobolka Shabeellaha dhexe.
