Muqdisho:(SONNA)-Diyaarad ka diiwaan gashan dalka Kenya ayaa maanta ku gubatay garoonka diyaaradaha magaalada Beledweyne waxaana laga badbaadiyay diyaaradda sadax ruux oo saarnaa in kasta oo dhawacyo soo gaareen.
Diyaaradda oo ka soo duushay dalka Jabuuti ayaa sida raashin ciidamada Jabuuti ee qeybta ka ah Amisom ay ugu tala galeen dadkii ay saameynta ku yeesheen daadadkii Beledweyne waxaana gabi ahaanba ku gubtay diyaaradda raashinkaas.
Sabab dhalisay dabka diyaaradda ka kacay ayaa lagu sheegay in diyaaraddu markii ay soo caga dhigatay mid ka mid ah taayirada uu u baxay taas oo keentay in ay ka baxdo dhabaha diyaaraduhu ku ordaan isla markaana dab qabsaday sida uu Warbaahinta Qaranka u xaqiijiyay Col Isaaq Cali Cabdulle taliyaha qeybta booliiska gobolka Hiiraan.
