Muqdisho:(SONNA)- Guddoonka Sare ee Maamulka gobolka Banaadir oo uu hogaaminayay Guddoomiyaha gobolka Banaadir ahna duqa magaalada Muqdisho Mudane Cumar Maxamud Maxamed (Cumar Filish) ayaa howla kormeer ah ku tagay qaar kamid ah waraha lagu keediyo daa’dadka roobka ee kuyaala degmooyinka gobolka Banaadir si ay ugu kuurgalaan shaqooyinka ay waaxda howlaha guud ka sameysay Warahaas.
Goobaha ay masuuliyiinta kormeeren waxaa kamid ah bulaacada dhaxmarta wadada Dekada Muqdisho oo dib u habeyn balaaran lagu sameeyay si daa’dadka roobka loogu helo biya-mareena si tooska ugu shuba Bada, islamarkaana aysan hakad ugalin isku socodka wadadaas.
Waxa ay sidoo kale kormeereen wadada hormarta xarunta dugsiga tababarka ciidanka boliiska Soomaaliyeed oo ay dowlada hoose dib u furtay maadama ay biya-dhigeen roobkii da’ay dhowrkii cisha ee lasoo dhaafay.
Warta Number Afar oo kamid ah goobaha ay sida xoogan uga shaqeysay dowlada hoose Xamar ayay sidoo kale kormeeren masuuliyiinta si ay u qiimeeyaan saameenta roobka iyo howlihii laga qabtay.
Guddoonka Sare ee Maamulka gobolka Banaadir ayaa sidoo kale kormeeray Warta Hilaac ee degmada Wadajir oo ay si weyn u sameeyeen roobkii da’ay, duqa magaalada Muqdisho ayaa ku amray in si deg deg ah dib u hagaajin loogu sameeyo wartani.
Ugu danbeyn masuliyiintan ayaa booqday warta Siigaale ee degmada Hodan oo ay buux dhaafiyeen daa’dadka roobka islamarkaana uu bur bur xoogan soo gaaray wadada isku xirta isgoosyada KBB iyo Shaqaalaha.
