Jowhar-(SONNA)-Wasiirka Caafimaadka ee Dowlad Goboleedka Hirshabeelle, Cabdi Macallin Muxumad, ayaa sheegay in ay Jowhar ka dhisayaan Isbitaal u gaar ah Dadka uu soo ritay Shuban Biyoodka.
Wasiirka oo la hadlayay warbaahinta Qaranka Soomaaliyeed ayaa intaa ku daray in Dadka xanuunsan aan lagu dhex hayn karin bukaannada kale ee jiifa Isbitaallada, maaddaama uu ka mid yahay Shuban biyoodka cudurrada faafa.
Cudurkan oo ka dillaacay inta badan Degmooyinka Gobollada Hirshabeelle ayaa sida uu Wasiirku sheegay wuxuu haatan marayaa heerkii ugu hooseeyay, si weyna ay ula tacaaleen waxyeelladiisa, iyagoo garab ka helaya hay’adda caafimaadka Adduunka ee WHO.
Dad ku dhow 900 Qof ayuu sheegay Wasiirku inuu haatan soo ritay Cudurka, iyadoo ay dedaallada lagu xakamaynayana bar-bar socdaan gurmadyo xooggan iyo wacyi gelinno ay siinayaan Bulshada ku dhaqan Hirshabeelle.
