Muqdisho-(SONNA)-Wasiirka Warfaafinta, Dhaqanka iyo dalxiiska ee Xukuumadda Soomalaiya mudane Maxamed Cabdi Xayir (Maareeye) ayaa maanta tababar u furay 20 Saxafi oo ka kala tirsan Warbaainta Qaranka, maamul Goboleedyada iyo tan madaxa bannaan.
Tababarkan oo soconaya muddo shan maalin ah ayaa waxaa bixinaya Machadka tababarrada warbaahinta Caalamiga ah ee Al-Jaziira.
Maxamed Caddoow, oo ka howlgalla Warbaahinta Al-Jaziira ayaa sheegay in ay Saxafiyiintu wax ka bari doonaan xirfadda wariyaha, sameynta wararka iyo Barnaamijyada, taas oo la doonayo in sare loogu qaado tayada iyo xirfadda wariyayaasha Soomalaiyeed.
Wasiirka warfaafinta Soomalaiya, Maxamed Cabdi Xayir oo furay tababarka ayaa ku boorriyay Saxafiyiinta in ay ka faa’iideystaan siminaarkan.
Mudane Maareeye ayaa sheegay in muddooyinkan ay Wasaaradda Warfaafintu wadday dedaallo sare loogu qaadayo garaadka iyo tayada aqoonta Saxafiyiinta Soomalaiyeed.
“Waxaan machadka Al-Jaziira uga mahadcelinayaa tababarka ay siinayaan wariyeyaasha Soomaaliyeed, aad ayaan uga mahadcelineynaa iskaashiga ka dhexeeya Al-Jaziira iyo dowladda”ayuu yiri Wasiirka Warfaafinta.
Wasiirka ayaa ugu mahadceliyay Warbaahinta Al-jaziira tababarrda joogtada ah ee ay siiso Suxufiyiinta Dalka, wuxuuna sheegay in ay sii wadi doonaan sare u qaadidda tayada wariyaha Soomaaliyeed.
