Muqdisho(SONNA) Munaasabad ballaaran oo xariga looga jarayay chanelka labaad ee TV Qaranka Soomaaliyeed ee (SNTV2) ayaa ka dhacday xarunta wasaaradda Warfaafinta Dhaqanka iyo Dalxiiska Soomaaliya.
Xafladda oo uu si rasmi ah xarigga uga jaray wasiirka Warfaafinta Xukuumadda Soomaaliya mudane Maxamed Cabdi Xayir(Maareeye) ayaa sidoo kale waxaa ka qeybgalay xildhibaan Sakariye Xaaji Maxamuud oo ka tirsan Golaha Shacabka,guddoomiye kuxigeenka arrimaha bulshada ee gobolka Banaadir Basmo Caamir Shikeeti,agaasimeyaasha waaxyaha ee wasaaradda,shaqaalaha iyo marti sharaf kale.
Mudane Maxamed Cabdi Xayir Maareeye ayaa sheegay in furitaanka (SNTV2) uu ahmiyad weyn siin doono baahinta barnaamijyada arrimaha bulshada,taasii ay tahay sababta ay wasaaraddu u go’aansatay in bulshada laga haqabtiro baahiyohooda dhanka madadaalada iyo arrimaha bulshada laxiriira.
xildhibaan Sakariye Xaaji Maxamuud iyo Basmo Caamir Shikeeti guddoomiye kuxigeenka arrimaha bulshada gobolka Banaadir ayaa ku amaanay madaxda wasaaradda in ay ka jawaabaan baahiyaha bulshada dhinaca warbaahinta,maadaama wasaaraddu ay furtay chanel labaad oo(SNTV2) kaasi loogu talagalay in lagu baahiyo oo qura arrimaha bulshada muhiimka u ah.
