Beijing-(SONNA)-Safaaradda Jamhuuriyadda Federaalka Soomaaliya ee magaalada Beijing, dalka Shiinaha, ayaa si heer sare ah u xustay sanadguuradii 65-aad ee kasoo wareegtay maalintii ay Soomaaliya xorriyaddeeda qaadatay.
Munaasabadda waxaa ka qeyb galay masโuuliyiin sare oo ay ka mid ahaayeen danjirayaal, diblomaasiyiin, madax ka socotay wasaaradaha dowladda Shiinaha, aqoonyahanno, ganacsato iyo jaaliyadda Soomaaliyeed ee ku dhaqan Shiinaha.
Munaasabadda ayaa lagu qabtay xarunta safaaradda, iyadoo lagu furay bandhig sawirro taariikhi ah oo ka tarjumaya halgankii xorriyadda iyo horumarka dalka. Waxaa sidoo kale lasoo bandhigay hiddo-dhaqanka Soomaaliyeed, muuqaallo muujinaya bilicda dalka iyo hal-abuurka shacabka Soomaaliyeed.
Safiirka Soomaaliya ee Shiinaha, Dr. Hodan Cusman Cabdi, ayaa jeedisay khudbad muhiim ah oo ay ku adkaysay qiimaha ay leedahay maalinta 1-da Luulyo.
Waxay sidoo kale ka hadashay dadaallada dowladda Federaalka ay ugu jirto horumarinta dalka iyo xoojinta xiriirka saaxiibtinimo ee Soomaaliya iyo Shiinaha.
Danjire Xue Bing, Wakiilka Gaarka ah ee Shiinaha u qaabbilsan Geeska Afrika, ayaa bogaadiyay horumarka ay Soomaaliya ku tallaabsatay, wuxuuna muujiyay sida ay dowladda Shiinuhu uga goโan tahay taageerada Soomaaliya.
Waxaa sidoo kale la xusay in Madaxweynaha Shiinaha Mudane Xi Jinping uu hambalyo u diray Madaxweyne Xasan Sheekh Maxamuud.
Munaasabadda waxaa lagu soo bandhigay ciyaaro dhaqameed ay sameeyeen dhalinyarada Soomaaliyeed iyo arday Shiinays ah, kuwaas oo si weyn u soo jiitay marti-sharaftii.
Safaaraddu waxay u mahadcelisay howlwadeennada, ardayda iyo mutadawiciinta doorka muuqda ee ay ka qaateen guusha xafladda, taas oo si cad u muujisay midnimada iyo firfircoonida jaaliyadda Soomaaliyeed ee Shiinaha.
