Shabeellaha hoose(SONNA):-Wasiirka Gaashaandhigga XFS, Mudane Axmed Macallin Fiqi, iyo Wasiirka Arrimaha Gudaha, Mudane Cali Yuusuf Cali (Xoosh), ayaa maanta si rasmi ah xarigga uga jaray Buundada Sabiib iyo Caanoole ee gobolka Shabeellaha Hoose, taas oo dib loo dayactiray kaddib markii ay burburiyeen kooxaha argagixisada Khawaarijta Al-Shabaab.
Wasiirradu waxay carrabka ku adkeeyeen in dib-u-furista buundooyinkan ay si weyn u kordhin doonto isku xirka bulshada, dhaqaalaha deegaanka, iyo fududeynta hawlgallada ciidamada. Waxay sidoo kale xuseen in Dowladda Federaalka ay wado hirgelinta mashaariic horumarineed oo lagu xoojinayo kaabayaasha dhaqaalaha iyo amniga ee gobolka Shabeellaha Hoose.
Dib-u-dhiska buundooyinkan ayaa ka mid ah dadaallada joogtada ah ee Dowladda Federaalka Soomaaliya ay ku adkeyneyso maamul-wanaagga, isku socodka shacabka, iyo sugidda amniga deegaannada laga xoreeyay kooxaha Khawaarijta Al-Shabaab.
Munaasabadda furitaanka waxaa goob joog ka ahaa Taliyaha Ciidanka Dhulka XDS, S/Guuto Khaalid Maxamed Maxamed; Taliyaha Ciidamada AUSSOM, S/Guud Sam Kavuma; iyo wakiillo ka socday Safaaradda Turkiga. Masโuuliyiintu waxay ammaan ku muujiyeen dhismaha iyo dib-u-hagaajinta buundooyinkan oo ah kuwo istaraatiiji ah u ah isku socodka bulshada, gaadiidka, iyo howlaha amniga ee gobolka.
v
