Muqdisho-(SONNA)-Wasiirka Wasaaradda Cadaaladda iyo Arrimaha Dastuurka ee XFS Mudane Xasan Macallin Maxamud, ayaa maanta si rasmi ah u furay kulan wadatashi oo ku saabsan dhameystirka iyo daahfurka Machadka Sare ee Tababarka iyo Horumarinta Sharciga.
Kulanka waxaa ka soo qeyb galay mas’uuliyiin ka kala socday bahda garsoorka, xeer-ilaalinta, ururka qareennada, nootaayooyinka, Midowga Jaamacadaha iyo Agaasinka Tacliinta Sare.
Wasiir Xasan Macallin ayaa xusay in sharcigu yahay aas-aaska dowladnimada, isagoo carabka ku adkeeyay in horumar dhaqaale iyo iskaashi caalami ah aysan suurtagal noqon karin la’aanta nidaam sharci oo hufan.
Wasiirka ayaa sidoo kale tilmaamay in Machadka Sare uu yahay fursad weyn oo lagu tayeynayo xirfadlayaasha garsoorka iyo kobcinta aqoonta sharci ee dalka, taas oo kaalin muuqata ka qaadan doonta dhismaha nidaam garsoor oo hufan.
