Muqdisho(SONNA):-Wasiirka Beeraha iyo Waraabka Xukuumadda Federaalka Soomaaliya Mudane Maxamed Cabdi Xayir Maareeye oo ka hadlayay Banaanbaxa balaaran ee lagu taageerayo heshiiska Soomaaliya iyo Turkiga ayaa sheegay in shacabka Soomaaliyeed ee ku dhaqan Hargeysa iyo Burco diideen damaca gurracan ee Ethiopia.
Wasiir Maareeye” Shacabka Hargeysa iyo Burco way hadleen waxayna muujiyeen sida ay u diidan yihiin in baddooda iyo dhulkooda la qaato, waxayna doonayaan in Soomaali heshiiso oo dhulkeeda cid kale qaadan, waxaana ku amaanayaa shacabka iyo maamulka gobolka Banaadir sida ay u garab taagan yihiin dowladdooda” ayuu yiri wasiir Maareeye.
Mudane Maxamed Cabdi Xayir Maareeye ayaa ku bogaadiyey shacabka caasimadda inay yihiin kuwa u taagan midnimada dadka Soomaaliyeed kuna bixiya dhaqaalahooda, isagoo intaa ku daray in shacabka Soomaaliyeed guud ahaan rabo midnimmo iyo wadajirka dadka Soomaaliyeed.
Mudane Maxamed Cabdi Xayir Maareeye ayaa sheegay in muddo bil gudaheeda keeni doonaan Xildhibaannada Labada Aqal ku matala gobollada Waqooyi qorshe lagu dhameynayo tabashada ay qabaan walaalaha Waqooyi si wadajirka dadeed ee Soomaaliya loo xaqiijiyo, meeshana looga saaro kala qeybinta dadka walaalaha ah.
Siyaasiyiinta iyo shacabka gobollada Waqooyi ee Jamhuuriyadda Federaalka Soomaaliya ee (Soomaaliland) aya ku tilmaamay damaca gurracan ee Ethiopia mid aanan marna ka hirgali doonin badda Cas, islamarkaana diyaar u yihiin difaaca dhulleed ee Soomaaliya.
