Wasiirka cusub ee Gaashaandhigga Axmed Macalin Fiqi oo ka hadlay xafladdii xil-wareejinta ayaa sheegay in furimaha hore uu ka hoggaamin doono dagalka ay wadaan ciidanka qaranka ee la doonayo in lagu soo afjaro kooxaha nabad-diidka ah ee khawaarijta.
“waxaan si wanaagsan oo ixtiraam leh ula shaqey doonaa Talisyada ciidamada, anagoo sixi doona xuquuqda ciidamada qaranka”ayuu yiri wasiir Fiqi.
Wasiirkii hore ee Gaashaandhigga Jabriil Cabdirashiid iyo Wasiiru Dowlaha Gaashaandhigga Cumar Cali Cabdi oo iyaguna ka hadlay xafladdaasi ayaa yiri“Wasaaradda Gaashaandhigga waxay heshay masuul aqoon u leh shaqada iyo la-dagaallanka Khawaarijta.
Mas’uuliyiintaasi ayaa tilmaamay in wasaaradda ay u baahan tahay in si gaar ah diiradda loo saaro xaaladda ciidankii u naafoobay difaaca dalka.
Mudane Axmed Macallin Fiqi ayaa horey u soo qabtay xilal kala duwan,waxaana la filayaa inuu khibraddiisa iyo aqoontiisa u adeegsado xoojinta awoodda ciidamada qalabka sida iyo horumarinta qorshayaasha amniga qaranka.
