Muqdisho(SONNA]:-Wasiirka Arrimaha Dibadda Xukuumadda Federaalka Soomaaliya Mudane Axmed Macallin Fiqi oo wareysi siiyay warbaahin Qaranka oo xog cusub ka bixiyey halkii ay ku dambeeyeen wadahadallada Soomaaliya iyo Itoobiya.
Mudane Axmed Macallin Fiqi ayaa sheegay in wadahadallada wareegga 3-aad ay hakad u galeen mashquul labada dhinac ah taasoo ka dambeysay shirkii guud ee Qaramada Midoobay oo soo dhax-galay, waxuuna tilmaamay in dowladda Turkiga dadaal xooggan ku bixineyso in natiijo laga helo shirka loo madlanyahay.
โWadahadalaas way soo socdeen runtii, bishii 7-aad iyo 8-aad waa la fadhiistay wareegga 2-aad, midka 3-aad ayaa loo balansanaa bishii 9-aad taasi ma dhicin, shirkii QM ayaa soo dhax-galay dib ayaa loo dhigay, balse howshaas wali way socotaa dowladda Turkiga dadaal xooggan ayay wadaa balse meesha uu gaari karo ma qayaasi karno, waxaana rajeyneynaa inuu guul ku soo dhamaado oo miirka u soo laabto madaxda hadda ka tilisa Ethiopia ayna runta u soo jeestaanโ ayuu yiri wasiir Fiqi.
Wasiirka Arrimaha Dibadda XFS ayaa u sheegay Madaxda Ethiopia inay xaqiidda u soo laabtaan oo runta isu sheegaan, si wadallo natiijo leh loo gaaro, isagoo ka rajeeyay kulanka 3-aad mid natiijo ay ka dhalato.
โEthiopia haday maalgalin rabaan Barbara ayay qeyb ka heleen, laakiin marabaan, xitaa Jabuuti ayaa dhahday bad ayaan idin siineynaa marabaan way ka muuqataa inaysan ka jawaabin. Waxuu is tusay riyo been ah, kuwaa been u sheegay in Soomaaliya jilicsantahay oo waxeeda la qaadan karo, balse taas sax ma ahan oo waxaa diiday Soomaaliya iyo dhamaan dowladaha Adduunka iyo hay’adaha caalamiga sid QM iyo AUโ ayuu intaas ku daray Wasiirka.
Mudane Axmed Macallin Fiqi ayaa xasuusiyay Ra’iisul Wasaaraha Ethiopia Abiy Axmed in taliskii isaga uu kamid ahaan jiray waxa soo ka raacay xadgudubkii dhawaa kaas oo ay ku doonayeen inay Soomaaliya ku qabsadaan balse ugu dambeyn iyagii loo tuugay inay nabad ku baxaan oo jidka loo galin.
โHoggaankii hore waa tii isagana soo haweystay dhulka Soomaaliyeed soona galiyay ciidammo gaaraya 50 kun, maxay dhaxalsiisay taas, in la codsaday inay ciidankooda nabad-galyo ku baxaan oo aanan jidka loo galin, iyagoo xaalka ku xunyahanya xaduudka ka baxeen, Ra’iisul Wasaaraha Ethiopia Abiy Axmed wuu hurdayaa Taariikhdaaas ma akhrin, waliba ah mid dhow oo isaga uu ahaa sargaal wayn oo ka tirnaa nidaamkii xiligaasโ ayuu yiri Mudane Fiqi.
Wasiirka Arrimaha Dibadda Xukuumadda Federaalka Soomaaliya Mudane Axmed Macallin Fiqi ayaa ugu dambdeyn sheegay inay Soomaaliya diyaar u tahay heshiis waa hadii nidaam sax loo soo maro oo quwaaniinta caalamiga ah la ixtiraamo balse taasi Ethiopia iska indha tireso.
โSoomaaliya heshiis ma diidano baddaan Allaa nasiiyay, in laga faa’ideysto oo kheyraadka ku jira laga soo saaro, hadii dowladda Dariska canshuur looga heli karo oo wax kala soo dagaan dowlad Soomaaliyeed heshiis lala galaya wax diidaya majiraan, waxaa la diidanyahay waa ciidan ayaa geysanayaa, waana taas midda dowladda diiday balse waxii heshiis ah diyaar ayay u tahayโ.
Taliska Ra’iisul Wasaaraha Ethiopia Abiy Axmed ayaa bishii January ee sanadka heshiis beenaad ah la galay maamulka Hargeysa ee Waqooyiga Soomaaliya, taasoo uu kula kulmay waji gabax diblomaasiyadeed, kadib markii dowladda Soomaaliya qaaday talaabooyin lagu diiday xadgudubkaas.
