Muqdisho(SONNA):-Wasaaradda Xajka iyo Cumrada dalka Boqortooyada Sacuudi Carabiya oo kaashanaysa dhiggeeda dalalka Islaamka ayaa ayaa billowday olole caalami ah oo wacyigelin oo lagu gaarsiinayo fariimo ku saabsan ku-dhaqanka awaamiirta xajka iyo gudashada cibaadada kana fogaadaan waxkasta oo xajkooda ka xumeyn kara. Fariimahaaas oo ku baxaya 15 luqadood oo ah kuwa ugu badan ee looga hadlo uguna baahsan adduunka.
Ololaha wacyigelinta ah ayaa waxaa ka mid ah in lagu faafiyo awaamiirta iyo shuruucda loo marayo xajka warbaahinta qeybaheeda kala duwan iyo wacyigalin laga sameynayo 20 garoon diyaaradeed oo dalka Sacuudiga ah, iyo in isku xir loo sameynayo xarumaha Islaamiga ah iyo tirokoobyada si fariimaha wacyigalinta ah loo gaarsiiyo dhammaan dadka doonaya inay soo gutaan waajibaadka xajka ee sanadkan.
Sidoo kale Wasaaradda Xajka iyo Cumrada Boqortooyada Sucuudi Carabiya ayaa waxay dhaqan galisay fariimo dadka lagu baraya hanaanka gudashada Xajka iyo Cumrada, kuwaas oo laga baahinaya diyaaradaha ku sii socda dalka Sacuudiga ee sida xujeyda, iyadoo dadka lagu gaarsiinayo luuqado ay fahmi karaan.
Wasaaraddu oo dhowr qoraal ah soo dhigtay baraheeda rasmiga ah ee baraha bulshada ayaa dadka la wadaageyso fariimo wacyigalin iyo toosin ah waxayna tiri ” Markaad u socoto Xajka, akhri hagaha wacyi-gelinta sharciga ah, oo baro xuquuqdaada iyo waajibaadka ku saaran iyo ujeedka aad u socota adigoo raacaya nuxurka Xajka, Cumrada iyo Wacyigelinta ku qoran luqadda adiga kugu habboon”.
Wasaaradda Xajka iyo Cumrada ayaa marti-sharafta Alle u soo bandhigtay tilmaamo badan oo sharraxaad ah, waxaana ka mid ahaa: Tusaha Masjidka Xaramka, Tusaha Masjidka Nabiga NNKH, Tusaha Adeegga Masjidka Nabiga, NNKH, iyadoo dhanka kale suurtogelisay mareegyo dadka xujeyda ah ka heli karaan hanaanka sharuudaha xajka iyo wajibaadka laga doonaya xaajiga.
Xujeyda Soomaalida oo sannadkaan gaareysa 11 kun iyo 500 oo Xaaji ayaa ee ka kala baxaya Garoomada Diyaaradaha dala ayaa kamid ah dadka lagaarsiinayo fariimaha wacyigalinta ah ee wasaaradda Xajka iyo Cumrada Boqortooyada Sacuudi Carabiya ugu talagashay xujeyda sanadkan.
Dhanka kale wasaaradda Awqaafta iyo Arrimaha Diinta XFS ayaa iyana dadaal xoogan ugu jirto in muwaadiniinta Soomaaliyeed ee sanadkan xajinaya inay xajkooda u gutaan sida ugu wanaagsan, iyadoo ku dadaaleyso in dadku heleen fariimaha muhiimka u ah gudashada acmaasha xajka.
Si aad u hesho xog wacyi-gelin ah oo ku saabsan xajka guji linkigan
