Muqdisho.(SONNA):- Wasiir ku-xigeenka wasaaradda caafimaadka xukuumadda federaalka Soomaaliya Maxamed Xasan ayaa warbaahinta qaranka uga warbixiyay qorshaha ay deegaannada laga xoreeyay Khawaarijta lagu gaarsiinayo adeegyo caafimaad.
Wasiirka ayaa sheegay in dowladda ay diyaarisay qorshe saddex weji leh oo adeegyada caafimaad lagu gaarsiinayo goobaha la xoreeyay.
“ Waa ay socdaan dadaalladoodii, koox ayaa loo xilsaaray oo ka shaqeynaya qorshahaas, wasiiru dowle ayaa tagay oo si hordhac ah goobaha Khawaarijta laga saaray u geeyay adeeg caafimaad oo isugu jira daawo iyo agab kale oo cisbitaaladaas gaarsiiyay,” ayuu yiri wasiir ku-xigeenka caafimaadka.
Sidoo kale, Wasiirka ayaa sheegay in wax Illaah loogu mahdiyo ay tahay in dadkii ku dhaawacmay qaraXyada Khawaarijta ay ka geysteen magaalada Muqdisho ee arrimaha caafimaadka ugu maqnaa dalka dibaddiisa in iyagoo caafimaad qabo dalka dib ugu soo noqonayaan, kuwaas oo helay daryeel caafimaad oo dhammeystiran.
Ciidamada xoogga dalka Soomaaliya ayaa markii ay la wareegeen gacan ku heynta deegaannada iyo degmooyinka argagixisada ay ku sugnaayeen, waxay bulshada deegaanka u sameeyeen adeegyo muhiim u ah noloshooda iyaga oo u qeybiyay raashin isugu jirta bur, sonkor, timir iyo Adeeg Caafimaad oo lacag la’aan ah.
Xukuumadda federaalka Soomaaliya ayaa horay u balan qaaday in si deg deg ah adeegyo caafimaad loo gaarsiinayo goobaha laga xoreeyay Khawaarijta si Bulshada halkaas ku nool u helaan adeeg caafimaad oo tayo leh, waxaana qorshahaas fulisay wasaaradda caafimaadka.
