Muqdisho(SONNA):- Sebtember 5, 2024, Madaxweynaha Shiinaha, Xi Jinping, wuxuu khudbad kaga hadlay furitaanka Foorumka Iskaashiga Shiinaha iyo Afrika ee Beijing, isagoo ugu yeedhay mid si wadajir ah loo gaadhi karo casriyeynta iyo abuurista mustaqbalka bulsho wadaag ah.
Sebtember 6, 2024, Madaxweynaha Shiinaha iyo Madaxweynaha Soomaaliya, Dr. Xasan Sheekh Maxamuud, waxay ku kulmeen Aqalka Shacabka ee Beijing halkaas oo ay ku dhawaaqeen in xidhiidhka labada dal la gaadhsiiyay heerka istiraatiijiyad wadaag ah. Tani waxay muujineysaa fursado waaweyn oo horumar u leh Afrika iyo gaar ahaan Soomaaliya.
Tan iyo markii la aasaasay Foorumka Iskaashiga Shiinaha iyo Afrika ee sanadkii 2000, iskaashiga Shiinaha iyo Afrika wuxuu noqday mid muhiim ah.
Madaxweynayaasha iyo madaxda labada dhinac waxay booqdeen dalalka midba midka kale, halka Shiinuhu uu taageero ballaadhan u fidiyay dalal badan oo Afrikaan ah. Haddii aan dib u eegno xiriirka Soomaaliya iyo Shiinaha, wuxuu bilaabmay 1964 markii Ra’iisul Wasaarihii hore Zhou Enlai uu booqasho ku tagay Muqdisho. Shiinaha wuxuu ka caawiyay Soomaaliya mashaariic fara badan oo horumarineed oo dhanka caafimaadka iyo beeraha.
Shirka Beijing wuxuu ku saabsanaa casriyeynta, taas oo la jaan qaadaysa hadafyada Afrika ee qorshaha 2063. Madaxweyne Xi Jinping wuxuu sheegay in casriyeynta cusub ee Afrika ay tahay mid caddaalad ah, dadku ku horeeyaan, isdhexgal la sameeyo, deegaanka la ilaaliyo, iyo nabad la gaadho. Shiinaha wuxuu doonayaa inuu taageero siiyo dalalka Afrika si ay u gaadhaan isbeddelka casriyeynta iyadoo la xoojinayo wada shaqeynta.
Talaabooyinka “Toban Iskaashiga”
Shiinaha wuxuu soo bandhigay ‘Toban Iskaashi’ oo ay ka mid yihiin isdhaafsiga siyaasadda, ganacsiga, isku xidhka, caafimaadka, waxbarashada, iyo horumarinta cagaaran. Si loo hirgeliyo qorshahayaashan, Shiinaha wuxuu ballan qaaday inuu bixiyo taageero dhaqaale oo gaadhaysa 360 bilyan oo yuan ah, sanadaha soo socda. Waxa kale oo uu Shiinaha sameyn doonaa mashruucyo caafimaad iyo tamar nadiif ah si ay u taageeraan casriyeynta Afrika.
Madaxweynaha Soomaaliya,Xasan Sheekh Maxamuud, wuxuu ku nuuxnuuxsaday muhiimadda ay leedahay in Soomaaliya ay hesho nabad iyo xasillooni, isagoo sheegay in Shiinaha uu yahay saaxiib lagu kalsoon yahay.
Gunaanad
Shiinaha iyo Soomaaliya waxay leeyihiin xidhiidh soo jireen ah oo ku salaysan isfaham iyo iskaashi wadajir ah. Horumarka maanta wuxuu la xidhiidhaa horumarka Afrika iyo Soomaaliya, waxaa na labada dhinac ay ku jiraan dariiq la isku halleyn karo oo ku beegan horumar iyo casriyeyn waarta.
W/Q Dr. Abdilahi Ismail Abdilahi, ( Lecture at School of African Studies, Beijing Foreign Studies University).
