(SONNA) – Shirka Amniga Soomaaliya oo 12-kii December 2023 ka dhacay Xarunta Qaramada Midoobay ee New York ayaa ahaa shir looga hadlayay Amniga Soomaaliya. Waxaana shir guddoomiyay Madaxweynaha Jamhuuriyadda Federaalka Soomaaliya Mudane Xasan Sheekh Maxamuud, iyadoo ay ka soo qeyb galeen 28 dal oo ay ka mid yihiin Midowga Afrika, Midowga Yurub, Qatar, Sacuudiga, Turkiga, Imaaraadka Carabta, Ingiriiska, Qaramada Midoobay iyo Mareykanka.
Madaxweynaha Jamhuuriyadda waxa uu ku soo bandhigay qorsheyaasha hirgelay ee dib u dhiska ciidamada, xoreynta deegaannada ku jira gacanta argagixisada, muhiimadda iskaashiga amniga ee heer qaraadadeed iyo heer caalam, bixitaanka ciidamada ATMIS iyo xasilinta siyaasadeed ee Soomaaliya.
Saaxiibada Caalamka ee shirka ka soo qeyb galay ayaa sheegay in ay taageerayaan Soomaaliya, iyagoo qiray horumarka uu dalka ku tallaabsaday. Waxa ay ku bogaadiyeen DFS qaabka ay u wajahday aragtideeda ku wajahan horumarinta laamaha amniga. Tallaabadan ayaa ah mid muhiim u ah in Soomaaliya awood loo siiyo in ay gacanta ku dhigto arrimaheeda amniga iyo sidii loo sii xoojin lahaa xasilloonida dalka.
Ciidamada Qalabka Sida ee Soomaaliya oo kaashanaya kuwa deegaanka, kuwaas oo gacan ka helaya saaxiibada caalamka ayaa sameeyay horumar la taaban karo. Dadaalkan wadajirka ah ayaa muujinaya habka wax looga qabanayo caqabadaha amniga Soomaaliya. Waxay xooga saaraysaa waxtarka ay leedahay in laga wada shaqeeyo xaqiijinta nabadda iyo xasiloonida JFS.
Shirka Amniga Soomaaliya ee 2023 wuxuu caddayn u yahay sida ay Beesha Caalamka uga go’an tahay inay Soomaaliya ka caawiso sidii ay u heli lahayd mustaqbal xasilloon oo barwaaqo ah. Hanaanka wada shaqayneed ee shirkani waxa uu dajinayaa taageerada iyo la shaqaynta Soomaaliya iyada oo sii wada socdaalkeeda ku wajahan nabad waarta iyo isku filnaansho, arrimaha amniga.
