Muqdisho(SONNNA):- Saraakiisha ciidamada xaq-u-dirirka deegaanka Guullane, barbaarta gaashaaman, abwaanno,dhallinyaro, haween iyo qeybaha kala duwan ee Bulshada ayaa soo dhoweyn heerkeedu sarreeyo ugu sameeyay deegaankaas saraakiisha wacyigelinta Ciidamada Xoogga Dalka oo maalmihii u dambeeyay ku sugnaa furimaha hore ee lagula dagaallamayo kooxda Khawaatijta Al-shabaab.
Waxaanna ugu horeyn goobta, shirib lagu cabirayay halganka lagula jiro Khawaarijta iyo gumaadka ay shacabka ku hayaan ka soo jeediyay abwaannada iyo waxgaradka deegaanka Guullane.
Qaar ka midnah odayaasha dhaqanka deegaanka, saraakiisha xaq-u-dirirka iyo guddoomiyaha deegaanka Guullane oo goobta ka hadlay ayaa si wadajir ah ugu mahadceliyay guud ahaan madaxda Dalka iyo sida markasta heegan ugu yihiin in Dalka laga xoreeyo Khawaarijta.
” Mahad Allaa iska leh, reer Guullane waxay ku faraxsan yihiin guusha laga gaaray Khawaarijta, waxaana madaxda qaranka u sheegeynaa in reer Guullane qeyb ka qaateen sidii Dalka looga xoreyn lahaa cadowga,” ayuu yiri mid ka mid ah waxgaradka oo goobta ka hadlay.
Sidoo kale, mid ka mid ah odayaasha dhaqanka ayaa yiri ” Dowlad la’aan waa dhib, Dowladda maanta noo timid kor Alle haka dhigo ayaa leennahay,”.
Ugu dambeyn, saraakiisha wacyigelinta ciidamada xoogga dalka ayaa ka mahadceliyay soo dhoweynta ay u sameeyeen reer Guullane, iyagoo dadka deegaanka kula dardaarmay in ay sii laba jibaaraan halganka ay kula jiraan Khawaarijta.
Ciidamada Xoogga Dalka oo kaashanaya dadka deegaanka ayaa guulo wax ku ool ka gaaray dagaalka ay kula jiraan kooxda Khawaarijta Al-shabaab oo ah koox maafiyo ah oo shacabka Soomaaliyeed dil, qarxin iyo gumaad joogta ah ku haya in ka badan 15-sanno, waxayna hadda u muuqdaan kuwo gabalkooda sii dhacayo.
