Muqdisho(SONNA):-Sheekh Cabdiqaadir Soomow oo ka mid ah Culimada dalka ayaa khudbad dhinacyo badan taabaysa oo uu shalay ka jeediyey shirweynaha culimada Soomaaliyeed ee ka furmay Muqdisho, wuxuu ku bayaamiyey in ciidamada dagaalka kula jira kooxda xagjirka ah ee khwaariihta Al-Shabaab ay shuhado yihiin haddii ay ku dhintaan dagaalka.
Sh Soomow ayaa hadalkiisa sii raaciyay “Kuwa anaga naga dhinta waa Ahlu-Janno, ciidamada qalabka sida iyo kuwa deegaanka waxay ku jiraan Jihaad fii-sabiili-laah,Khawaarij in aan bixino ayaa isku waafaqsanahay shacab,dowlad iyo culimo ba.”
Culimadda ka qayb gashay shirweynaha ayaa ku dhawaaqay in ay qayb weyn ka qaadan doonaan halganka loogu jiro sidii dalka looga xorrayn lahaa khawaariijta” Dhamaanteen waxaa nagu waajib ah in aan galno Jihaadka, waxaa rabaa in loo duceeyo dhamaan intii ku shahiiday. Geesiyaasha ku dhintay dagaalka waa shahiideen,” ayuu yiri Sheekh Cabdiqaadir Soomow.
Sheekha Soomow ayaa dhinaca kale uga mahadceliyey madaxweynaha qaranka iyo Ra’iisul wasaaraha dalka qabashada shirweynaha Culimada Soomaaliyeed iyo dagaalka dalka looga xorraynayo kooxaha khawaariijta.
