Muqdisho-(SONNA)-Maxkamadda Ciidamada qalabka side ayaa maanta xukun dil ah ku fulisay saddex dhagar-qabe oo kala ahaa Maxamed Cabdulle Abkow Cumar (Biyamaalow), Shariif Maxamed Barqadle Ayaanle (Jeego) iyo Maxamed Cabdi Nuur Jiirow (Dhaqtar Fanax).
Raggan la toogtay ayaa waxay ku eedeynaayeen inay khawaarijta Al-shabaab u fuliyeen falal isugu jira qaraxyo iyo dilal.
1-Maxamed Cabdulle Abkow Cumar (Biyamaalow).ayaa khawarijta u fuliyay weraro argagixisnimo Disemar 14kii sanadki tagay weerar uu ka geystay maqaaxida Baar Caga weyne iyo dabley khawaarij ah oo uu u dusiyay garoonka Aadan cadde ee magaalada muqdisho,11-qof ayaa ku dhimatay gaari qarax ah oo uu dhigay maqaayadda caga weyne 16-kalana way ku dhaawacmeen.
Marso 23-2022 ayuu laba dabley ah geliyay garoonka, halkaas oo uu ku naf waayay Cabdirasaq Aabi Cali oo kamid ahaa ciidamadii ka fal celinayay weerarka, maanta ayaana lagu fuliyay xukunka dilka ah.
Abkow waxa uu ahaa laba xiddigle CXD sida uu sheegtay, balse tirakoobkii ciidanka ayaa laga saaray ciidamda kadib markii la waayay sax ahaanshahiisa xiddigaha uu sheegatay ,wuxuuna xilligaa kadib la saftay argagixisada xilli danbe sanadkii 2018-kii, wuxuu ahaa 36 jir ku dhashay degmada Jamaame ee gobolka Jubada hoose.
2-Shariif Maxamed Barqadle Ayaanle (Jeego) 12-kii January ee sanadkan ayaa lagu xukumay dil toogasha ah, kadib markii qarax uu dhigay Muqdisho Mool bishii 4-tii febaraayo 2019, weerarkaas waxaa ku naf waayay 16- qof halka 38 kalana ay ku dhaawacmeen inta la xaqiijiyay.
Jeego waxa uu soo noqday taliye urur, wuxuuna ka gaaray darajada ciidamada (Dhame) wuxuuna Sanaddii 2018 la saftay argagixisada, wuxuu ahaa 53-jir ku dhasahay Wisil gobolka Mudug.
3- Maxamed Cabdi Nuur Jiirow (Dhaqtar Fanax) ayaa January 15-dii sandkan lagu xukumay dil toogasho ah, waxa uu argagixisada ka mid ahaa illa soo ifbaxoodii, waxa uu ka soo shaqeeyay wax walba oo ay argagixisadu sameeyso, waxa uu ku dhiirraday in uu iska dhigo Sarkaal, Dhakhtar ama Shaqaale Rayid ah oo ka tirsan hay’adaha dowladda.
Wuxuu ahaa 38-jir ku dhashay Hiiraan, waxa uu lahaa fulinta werarro lagu qaaday dhallinyaro kubbad ku daawaneysay Garasballeey duleedka Muqdisho, waxa halkaasi ku dhintay saddex ruux oo uu ku jiray wiil yar oo afar jir ahaa.
Qaraxyo ka dhacay July labadeedii iyo Agoosto 19 maqaayado ay lahayeen dad danyar ah ayuu fulinteeda qeyb ku lahaa, waxana ku dhintay 20-qof 11-kalana way ku dhaawacmeen.
Feebaraayo 12 keedii waxa uu Ceel gaabta geeyay dhagar qabihii isku qarxiyay ergadii doorashada reer waqooyiga, hal askari ayaa halkaas ku dhintay , 11-kana way ku dhaawacmeen, maanta ayaa seddexdaba laga oofiyay xadka qisaasta ahaa.
