Muqdisho, 15 May 2025 – Madaxweynaha Jamhuuriyadda Federaalka Soomaaliya, Mudane Xasan Sheekh Maxamuud, ayaa ubax dhigay Taallada SYL ee magaalada Muqdisho, xuska munaasabadda halgankii gobannimo-doonka ee Ururka Dhallinyarada Soomaaliyeed awgeed.
Madaxweynaha ayaa dhallinyarada Soomaaliyeed ugu hambalyeeyay munaasabadda qiimaha badan ee 15-ka May, isaga oo ku bogaadiyay kaalinta muuqata ee ay ku leeyihiin horumarinta dalka iyo halganka lagu ciribtirayo kooxaha Khawaarijta.
Intii uu ku sugnaa Taallada halgameyaashii SYL, Madaxweynaha waxa uu xus iyo duco u sameeyay 13-kii dhallinyaro ee aas-aaska u ahaa Ururka SYL kuwaas oo horseed u noqday xornimada dalka. Madaxweynaha ayaa sidoo kale shacabka Soomaaliyeed meel kasta oo ay joogaan ku dhiirrigeliyay in ay ilaashadaan midnimadooda, wadajirkooda iyo dowladnimadooda, kuwaas oo ka mid ahaa mabaadi’da saldhigga u ahayd halgankii SYL.
