Muqdisho(SONNA):-Maleeshiyaadka Khawaarijta ayaa tacadiyo aad u fool xun u geystay shacabka Soomaaliyeed, kadib markii ay ku xad gudbeen xurmada naf, maal iyo sharafta dadka rayidka ah ee aan waxba galabsan.
Khawaarijtu waxay deeganadii laga saaray kula dhaqmi jireen dulmigii ugu darnaa iyo dulmigii ugu darnaa ee ay ku hayeen dadka rayidka ah ee ku dhaqan deegaanada ay maamulaan ka hor intii laga xoreyn, waxayna ku laayeen dad aan waxba galabsan, hantidoodii iyo xoolahoodiina ay dhaceen, hantidoodiina si sharci darro ah ku gubeen.
Warbixintan waxaan kaga hadli doonaa booqashadii ay warbaahinta Qaranku ku tagtay deegaanka “Cadalle” ee koonfurta gobolka Mudug, halkaasi oo sanadkii hore ay maleeshiyo dhalinyaro ah ku gubeen ceelal biyoodyo, guryo iyo masaajido ku yaala deegaankaasi.
Warbaahinta qaranka ayaa heshay xog ku saabsan xadgudubyada ay maleeshiyaadka Khawaarijta u geysteen dadka deegaanka “Cadalle” iyo dhibaatada ay kala kulmeen arxan darada Khawaarijta iyo falalka foosha xun ee ay kula kacayeen diinta islaamka.
Shacabka deegaanka ayaa go’aan ku gaaray in ay ka gadoodaan gumeysiga maleeshiyaadka Khawaarijta, isla markaana ay dib ugu laabtaan deegaannadii ay ka yimaadeen iyagoo dagaal adag kala hor tegay kooxda khawaariijta, dadka deegaanka ayaa hadda waxay ku shaqeystaan nolol maalmeedkooda si nabdoon oo kasoo kabasho leh.
Guddoomiyaha deegaanka Caddale Macalin Cabdillaahi Sh Salaad oo la hadlay warbaahinta qaranka ayaa warbixin ka siiyay xadgudubyada foosha xun ee haraadiga maleeshiyaadka Khawaarijta u geysteen dadka deegaanka, isagoo carabka ku adkeeyay in fal dambiyeedka ay ku kacayaan uu yahay mid ka fog. diinta Islaamka.
Wuxuu intaas ku daray in Diinta Islaamka ay ku boorrisay in la ilaaliyo Naf, Maal iyo Sharafka dadk,balse Khawaarijtu ay ku xad-gudbeen awaamiirtan.
Macallin Sheekh Salaad ayaa ku macneeyay in maleeshiyaadka Khawaarijta ay gubeen dhammaan ceelashii iyo guryihii deegaanka iyagoo xurmaynin bishii Ramadaan ee ina dhaaftay, wuxuuna falkaasi ka hor imaanayaa diinta Islaamka.
Axmed Xaashi oo ka mid ah dadka deegaanka ayaa sheegay in ay diyaar u yihiin in ay la dagaalamaan kooxaha Khawaarijta ah ee dhibaateeya shacabka.
Waxa uu sheegay in muddo 4-bilood ah aysan imaanin xubnaha kooxda Khawaarijta ah ee ku sugan gobolka, sababo la xiriira jawaab adag oo ay kala kulmeen shacabka ku dhaqan gobolka.
Shacabka ku dhaqan deegaanada la xoreeyay ayaa ka soo kabanaya tacadiyadii waaweynaa ee ay maleegayeen maleeshiyaadka Khawaarijta ah mudadii ay gacanta ku hayeen.
Maleeshiyada Khawaarijta ah ee Al-Shabaab iyo Daacish ayaa lagu tiriyaa kooxaha dambiilayaasha ah, sida lagu sheegay war-murtiyeedkii ugu dambeeyay ee culimada dalka, maadaama aysan argagixisada ku naaloon wax sharci ah oo dhanka diinta ah, maadaama ay qasab tahay in la diido tafsiirkooda khaldan ee aan sal iyo raadka lahayn ee ay ka bixinayaan diinta Islaamka.
Horjoogayaasha Maleeshiyada Khawaarijta Argagaxisada ayaa xiligan la kulma xaaladii ugu xumeyd ee ka dhalatay kacdoonka shacabka iyo sida ay Dowladda Federaalka uga go’an tahay ciribtirka Argagaxisada iyagoo taageero ka helaya shacabka soomaaliyeed.
