Muqdisho (SONNA):- Wada shaqeynta hay’adaha amniga Dowladda federaalka iyo shacabka ayaa suurta geliyay in la wiiqo awoodii Alshabaab iyo hoos u dhac ku yimid weeraradii wuxuushnimada ahaa ee ay ka geysan jireen magaalada Muqdisho iyo qaar ka mid ah gobollada Dalka.
Hay’adaha amniga ayaa xoojiyay is dhexgalka iyo in si dhiiranaan leh shacabka xogta Khawaarijta ula wadaagaan laamaha amniga si looga hortago dhagarta Khawaarijta ay shacabka u soo maleegaan.
Afhayeenka wasaaradda amniga gudaha Xukuumadda Federaalka Cabdi-Kaamil Shukri Macallim, ayaa warbaahinta qaranka u sheegay inuu meel wanaagsan marayo xiriirka wada shaqeyneyd ee shacabka iyo laamaha amniga,islamarkaana u soo dusiyaan xogaha amni ee ay helaan.
” Sida aad ogsoon tahay, waxa ugu weyn ee naga maqan waa amni, dadkuna wey jecel yihiin in ay la shaqeeyaan hay’adaha amniga, waqtigii aadkaa ee la soo maray ayaa wuxuu keennay in ay dadka u nuglanaadaan cadow ka awood batay, waxa uu garanaayo ay tahay dil, taasaa marka hore waxay keentay in ay dadka cabsadaan, laakiin muwaadiniinka Soomaaliyeed markii ay arkeen sida ciidanada Soomaaliyeed u shaqeynayaan si hufan ayay u soo gudbiyaan una soo gudbin jireen,” ayuu yiri afhayeenka.
Wuxuu intaas ku daray in howlgallada ay waddo Dowladda iyo xakameynta hubka ay sababtay amniga caasimadda.
Raโiisul Wasaaraha Xukuumadda Jamhuuriyadda Federaalka Soomaaliya, Mudane Xamsa Cabdi Barre, ayaa dhawaan guddoonsiiyey lacag dhan 20kun oo dollar muwaadin Soomaaliyeed oo soo sheegay mooto Bajaaj siday qarax ay kooxaha Khawaarijta ah doonayeen in ay ku dhibaateeyaan shacabka Sooamaliyeed.
Raโiisul Wasaaraha ayaa sheegay in tallaabadani ay ku timid wadashaqeynta iyo kalsoonida ay bulshada Soomaaliyeed ku qabaan hayโadaha ammaanka, isagoo ku ammaanay muwaadinkaas dhiiranaanta iyo wadaniyadda uu muujiyey ee uu ku badbaadiyey nafta iyo maalka shacabka Soomaaliyeed.
Dowladda Soomaaliya ayaa qaadday tallaabo ay kula dagaallameyso ilaha dhaqaalaha ee Khawaarijta, xilli deegaanno iyo degmooyin badan oo ka tirsan gobollada dalka laga saaray argagixisada oo shacabka hadda mabad ay ku nool yihiin.
Wada shaqeynta laamaha amniga iyo shacabka ayaa ugu dambeyn keentay in laga adkaado Khawaarijta dhagartooda, waxayna madaxda qaranku ku dadaalayaan sidii loo dhiiragelin lahaa muwaadinkii ku dhiirada inuu soo sheego xogta amni ee argagixisada, iyadoo la qarinayo xogta muwaadinka haddii uu u baahdo.
