Ciidamada Gaarka ah ee Kumaandooska Danab ayaa xalay hawlgal qorshaysan oo beegsi ah ka fuliyay deegaanka Buur Eylo oo ka tirsan Degmada Buur Hakaba ee Gobolka Baay.
Hawlgalka ayaa lagu bartilmaameedsaday koox ka tirsan maleeshiyaadka argagixisada Al-Shabaab waxaana halkaasi lagu dilay 22 maleeshiyaad ah, iyadoo sidoo kale la burburiyay dhammaan agabkii ay wateen kooxdaasi iyo gaadiid ay ka buuxaan walxaha qarxa.
Ciidamada Gaarka ah ee Kumaandooska Danab waxaa howlgalkaasi ku wehlinaayey saaxiibada caalamka, iyadoo la tilmaamay in shaqadaasi ay ku soo dhammaatay si nabad ah.
Xogta la helay ayaa muujinaysa in kooxdaasi ay qorshaynayeen weerarro lagu waxyeelleeyo shacabka Soomaaliyeed iyo bartilmaameedyo amni, balse ciidamada Danab ayaa ka hortagay qorshahaas ka hor inta uusan fulin.
Wasaaradda Gaashaandhigga iyo Taliska Ciidanka Xoogga Dalka Soomaaliyeed waxay ay bogaadiyeen sida geesinimada leh ee ciidanka qaranka ay mar kasta diyaarka ugu yihiin kahortagga iyo ciribtirka kooxaha khawaarijta ee caadeystay dhaca dadka rayidka ah ee Soomaaliyeed.
