Barcelona(SONNA) Kooxda kubadda cagta Barcelona ayaa kulan ka tirsan horyaalka La Liga waxa ay caawa ku soo dhoweynaysaa naadiga Granada garoonkeeda Camp Nou.
Macallinka cusub ee Barca, Quique Setien ayaa indhuhu hayaan caawa kaasoo kulankiisii ugu horreeyey hoggamin doonta Blaugrana.
61-sano jirkaan ayaa la xaqiijiyey inuu dhawaan shaqada ka badelay Tababare Ernesto Valverde, waxaana uu doonayaa inuu ku bilowdo guul uu ka gaaro kooxda fadhisa kaalinta 10-aad ee horyaalka La Liga kaddib 19 kulan oo xilli ciyaareedkan la ciyaaray.
Ogeysiiska Ciyaarta:-
Tartanka: Spain – La Liga
Taariikhda: Axad, 19 Jan 2020
Saacadda ay bilaabaneyso dheesha: 11:00 Habeennimo xilliga geeska Afrika.
Garsooraha: Valentin Pizarro Gomez (Spain)
Garoonka: Camp Nou
Wararka Kooxaha:-
Frenkie de Jong ayaa ka ganaaxan kooxda martida loo yahay ee Barcelona, kaddib markii uu kaarka cas qaatay, sidaasi darteed Sergi Roberto ayaa laga yaabaa inuu ka soo muuqdo khadka dhexe.
Luis Suarez ayaa garoomada ka maqan kaddib markii dhawaan qalliin lagu sameeyey, waxaana la filayaa inuu sii maqnaan doono illaa bisha May.
Ansu Fati ayaa ku soo bilaaban kara safka hore ee Barca, halka sidoo kale uu weerarka kooxda ku ciyaarta Camp Nou uu hoggaamin doono Griezmann.
Dhinaca kale Kooxda Granada ciyaaryahankeeda Maxime Gonalons ayaa diyaar ah kaddib markii uu ganaax ka soo laabtay, waxaana uu ka qoo muuqan karaa khadka dhexe.
Granada ayaa ku soo gali karta midkood shan difaac ama 4-4-2, iyadoo Jose Martinez uu imaan doono daafaca dhexe haddii loo baahdo.
Yangel Herrera ayaa dhaawacan oo shaki uu ku jiraa kulankan, laakiin haddiiba uu diyaar noqdo waa inuu ku bilowdaa safka hore maadaama aan la heli karin Angel Montoro kaasoo kaarka cas ku maqan.
Yan Brice Eteki oo isaguna ka tirsan Granada ayaa ka cabanaya dhibaato dhanka muruqa ah.
Xaqiiqooyinka ciyaarta:-
>- Barcelona ayaa guul gaartay 15 ka mid ah 16-keedii kulan ee ugu dambeeyey oo ay garoonkeeda ku ciyaartay kulammada horyaalka La Liga.
>- Kooxda Barcelona ayaa guuleystay lixdii kulan ee ugu dambeeyey oo ay garoonkeeda kula dheeshay Granada tartammada oo dhan.
>- Barcelona ayaa shabaqeeda gool ka ilaashaday shantii kulan ee ugu dambeeyey oo ay garoonkeeda ku qaabishay Granada tartammada oo dhan.
>- Granada ayaa guuldarro la kulantay shanteedii kulan ee ugu dambeeyey oo ay horyaalka La Liga ku soo ciyaartay meel ka baxsan garoonkeeda.
>- Barcelona ayaa dhalisay ugu yaraan saddex gool shan ka mid ah lixdeedii kulan ee ugu dambeysay oo ay garoonkeeda ku ciyaartay horyaalka La Liga.
>- Granada ayaa ku guuldarreysatay inay gool dhaliso saddexdeedii kulan ee ugu dambeeyey horyaalka La Liga oo ay ku soo ciyaartay bannaanka.
>- Kooxda Granada ayaa laga dhaliyey ugu yaraan labo gool shanteedii kulan ee ugu dambeeyey horyaalka La Liga oo ay ku soo ciyaartay meel ka baxsan garoonkeeda.
