Muqdisho (SONNA)-Ciyaaryahankii caanka ahaa ee reer Brazil Edson Arantes do Nascimento Pele oo noqday ciyaartoygii ugu caansanaa taariikhda casriga ah, ayaa geeriyooday isagoo 82 jir ah.
Geerida ninka kaliya ee seddex jeer ku guuleystay Koobka Adduunka isagoo ciyaaryahan ah ayaa waxaa Instagram-ka ku xaqiijisay gabadhiisa Kely Nascimento.
Pele waxa uu si joogto ah u qaadanayey daawaynta kiimiko tan iyo markii buro kansar ah laga soo saaray mindhicirkiisa Sebtembar 2021.
Waxa kale oo dhib ku ahayd inuu socdo isagoon la caawin tan iyo markii qaliinka lagu sameeyay lagu guul daraystay sanadkii 2012.
Marka laga soo tago koobab badan oo heer gobol iyo heer qaran ah, waxa uu ku guuleystay labo Copa Libertadores, oo ka tirsan Koonfurta Ameerika kaasoo u dhigma Champions League, iyo laba koob oo Intercontinental Cup, oo ah tartanka sanadlaha ah ee ay qabtaan kooxaha ugu fiican Yurub iyo Koonfurta Ameerika.
Edson Arantes do Nascimento, oo loo yaqaanay Pele, ayaa noqday xidig caalami ah markii uu 17 jir ahaa, wuxuu ka caawiyay Brazil inay ku guuleysato koobkii adduunka ee 1958 ee Sweden.
Waxa uu dhaliyay goolka kaliya ee ay 1-0 kaga badiyeen Wales wareega 8da, seddexley uu ka dhaliyay France semi-finalka iyo labo gool oo ay 5-2 kaga badiyeen xulka martida loo ahaa finalkii.
