Muqdisho,(SONNNA):- Duulaanka safka ballaaran ee howlgalka dhammeystirka wejiga koowaad ee xoeynta Dalka ee lagu baacsanayo Khawaarijta ku go’doonsan bariga gobolka Galguduud ayaa xaqiijiyay guulihii ugu horeeyay.
Ciidamo ka tirsan xoogga Dalka iyo kuwa deegaanka oo ka dhaqaaqay degmada Maxaas ee gobolka Hiiraan ayaa la wareegay deegaanka Wabxo oo ay isaga baxeen maleeshiyada kooxda gabalkooda sii dhacayo ee Al-shabaab.
Ciidamo isugu jira halyeeyada xaq-u-dirirka dadka deegaanka iyo kuwa xoogga Dalka oo uu horkacayo gudddoomiyaha degmadaas ayaa Khawaarijta ka saaray deegaannada kala ah Daadaale, Habar-cirir, Xiin-fardood iyo Jaaw oo dhammaantood hoostaga degmada Ceelbuur ee gobolka Galguduud.
Ciidamo habeenimadii xalay ka dhaqaaqay magaalada Dhuusamareeb ayaa ayaa kaabiga ku haya deegaanka Ceel-lahelay oo ay u jireen wax ka yar 10-km, iyagoo muddadii waddada ku sii jireen ku guuleystay bur-burinta fariisimo maleeshiyada ku lahaayeen deegaannada Sinidhaqo iyo Dhuumoodle ee gobolka Galguduud.
Marka laga reebo, miinooyin ay ku aaseen waddooyinka deegaannadaas gala oo lagu guuleystay soo saaristooda, ciidamada qaranku iyo dadka deegaanka lama kulmin wax iska caabin ah.
Galcad oo iyana Galguduud ka tirsan waxaa ku sugan Taliyaha Ciidamada Xoogga Dalka Generaal Ibraahim sheekh Muxudiin oo hoggaaminaya guluf xooggan oo qeyb ka ah howlgalka lagu qabanayo degmada faca weyn ee Ceelbuur si go’doonka looga saaray shacabka degmadaas oo in ka badan 15-sano Khawaarijtu haysato.
Sidoo kale, ciidamo badan oo ka dhaqaaqay Cadaado, Baxdo, Wisil iyo Xarar-dheere ayaa iyagana foodda ku haya deegaanno hore Khawaarijtu u maamuli jirtay oo uu ka mid yahay deegaanka Xiin-dheere, balse haatan badankooda ah isaga baxeen ka dib markii ay dareemeyn culeys weyn oo soo food-saaray.
Waxaa muuqata, in si habsami leh u socdo, guulo wax ku ool ahna lagu daah-furay dhammeystirka howlgalka wejiga koowaad ee dagaalka Dalka looga xoreynayo Khawaarijta ka dib 16-habeen oo madaxweynaha Jamhuuriyadda Mudane Xasan Sheekh Maxamuud caasimadda Galmudug u joogay agaasinka howlgalkan oo muhiim u ah qorshaha guud ee ka taqalusidda Khawaarijta.
Howlgalka waa mid si xowli ah u socda, daqiiqadba daqiiqadda ka dambeysa la filan karo guulo hor leh oo ay gaaraan ciidamada qaranka iyo dadka deegaanka oo iskaashanaya, waana dhab waxaa muddo ka dib soo afjarmay jiliinkii Khawaarijta iyo gumaadka ay ku hayeen shacabka.
