Guddoomiyaha Hay’adda Maareynta Musiibooyinka, Md. Maxamuud Macallin Cabdulle oo hoggaaminaya wafdiga Dowladda Federaalka Soomaaliya ee dalka Kuwait kaga qeyb-galay meertadii 6-aad ee Shirka Madal-goboleedka Carabta ee Yareynta Khataraha Musiibooyinka (Arab Regional Platform for Disaster Risk Reduction) ayaa kulan rasmi ah la qaatay Madaxa Ciidanka Dabdamiska Guud ee Dalka Kuwait, Major General Talal Mohammed Al-Roumi.
Kulanka ayaa diiradda lagu saaray xoojinta iskaashiga labada dal ee dhinacyada tababarrada, qalabaynta, iyo horumarinta adeegyada dabdamiska iyo gurmadka degdegga ah. Sidoo kale, waxaa laga wada hadlay isdhaafsiga aqoonta iyo khibradaha la xiriira guud ahaan maareynta xaaladaha degdegga ah ee dabku ugu horreeyo iyo halisaha la xiriira nuucyada kala duwan ee musiibooyinka.
Meertada 6-aad ee dalalka Carabta waxaa martigelisay Dawladda Kuwait iyadoo la kaashaneysa Xafiiska Qaramada Midoobay ee Yareynta Khatarta Masiibooyinka (UNDRR) iyo Ururka Jaamacadda Carabta. Waxaa ka qeyb galay in ka badan 600 oo qof oo ka socday dowladaha, ururrada bulshada rayidka ah, jaamacadaha, ganacsiga gaarka loo leeyahay, iyo hay’adaha caalamiga ah.
Ugu dambeyn; Guddoomiyaha Hay’adda Maaraynata Musiibooyinka (SoDMA) Md. Maxamuud Macallin Cabdulle ayaa uga mahadceliyay Dowladda Kuwait martigelinta shirkaan, isagoo bogaadiyay natiijooyinka madasha iyo Bayaanka Kuwait, halka uu si gaar ah u xusay taageerada ay Dowladda Kuwait siiso shacabka Soomaaliypeed.
