Muqdisho(SONNA):-Dhowaan ayaa Muqdisho lagu soo gabo gabeeyey Shirka Dowladda Federaalka Soomaaliya iyo Culimaa’udiinka Soomaaliyeed oo lagu gorfeynayey sidii loo ciribtiri lahaa fekerka gurracan ee xagjirnimada iyo waafajinta dowladnimada kaas oo ay baaqyo mideysan kasoo jeediyeen madaxda dowladda iyo Culimadii kasoo qeyb gashay kulanka,waxaynu qormadan diiradda ku saari doonaa doorka isbeddel ee shirkan ku keenay hawlgaladii ka socday dalka.
Guud mar kooban:
In ka badan mudo 15 sano ah waxa shacabka Soomaaliyeed dhibaato xooggan ku hayey kooxda arxanka daran ee khawaariijta oo kusoo duushay Diinta,dhaqan,maalka iyo sharafka ummada Soomaaliyeed,kooxda khawaariijta oo banaysatay dhiiga iyo maalka shacabka Soomaaliyeed iyagoo kusoo gabanaya Diinta Islaamka oo ah mid sharfan kana nasahan xumaan oo dhan.
Hadda ba tan iyo intii uu madaxweynaha jamhuuriyadda Federaalka Soomaaliya Mudane Xasan sheekh Maxamuud ku dhawaaqay dagaalka ka dhanka ah kooxaha Khawaariijta waxa door shariif ah oo bogaadin mudan ka qaatay Culimada Soomaaliyeed ee ku kala nool Guddaha Dalka iyo qurbaha,ugu horayn Culimadda dalka ayaa bilaabay kacdoon ka dhan ah kooxda khawaariijta iyagoo bulshadda Soomaaliyeed u bayaamiyey dulmiga iyo dhibaatada ay ku hayaan ummada Soomaaliyeed iyagoo sidoo kale culimadu bayaamiyey in kooxda Al-shabaab tahay koox aan diin shaqo ku lahayn oo khawaariij ah.
Culimadda Soomaaliyeed ee ku kala nool dalalka maraykanka,yurub iyo dalalka carabta ayaa iyaguna dhankooda soo saaray bayaan ay ku taageerayaan dagaalka lagula jiro kooxaha khawaariijta iyagoo shacabka Soomaaliyeed ugu baaqay inay garab istaagaan dowladda diidaana xukunka baadilka ah ee kooxaha khawaariij oo gumaad ba’an ku hayey shacabka Soomaaliyeed mudo 15 sano ah.
Doorka isbeddelka dagaal ee ka dib shirweynihii culimadda Soomaaliyeed:
Hadda ba ka dib shirkii culimadda waxa isbeddel xoog leh oo dardar ku socda ku korodhay hawgalada lagu beegsanayo kooxaha khawaariijta ee arxanka daran kuwaas oo laga saaray deegaanno badan laga dilay horjoogayaal sar sare,waxa dhinaca kale xoogaystay dadweynaha Soomaaliyeed ee ka qayb qaadanaya hawlgalka lagu cirib tirayo kooxaha khawaariijta,culimada ayaa ku caddeeyey in qofkasta oo ku geeriyooda dagaalka khawaariijta uu yahay shihiid,sidoo kale culimadda ayaa caddeeyey in qof walba oo keena xogta khawaariijta uu helayo ajar.
Saraakiisha Ciidanka xoogga iyo kuwa deegaanka ee dhowaan la wareegay degmada ceeldheer iyo deegaano hoos taga ayaa bogaadiyey bayaanka culimadda kornayl Yoonis oo qurbaha ka yimid ka dib bayaankii culimadda ayaa sheegay in uu so jihad tegay” waad og tihiin Culimada Soomaaliyeed waxa ay soo saareen fatwo,fatwadaas oo ah fatwo aan hore Soomaaliya uga dhicin,fatwadan waa fatwadii ugu qiimaha badnad ee ay soo jeediyaan culimada Soomaaliyeed,qof allaale iyo qofkii ka qayb qaataana maanta uu yahay qof jihaaday oo ku dhintay jihad xaq ah,wax aan ummada Soomaaliyeed ku boorinayaa in ay ka qayb qaataan jihaadka” ayuu yiri kornayl Yoonis.
Dhanka kale Bilish Axmed Carab waxa uu qoriga u qaatay ka dib markii ay kooxda khawaariijtu gawraceen walaakiisa Cabdiqaadir Axmed Carab” waxa ka mid ah dadka ehelka ii xiga Walaalkay Cabdiqaadir Axmed Carab waxay ka wateen degmada Ceeldheer waxayna ku khaarajiyeen Ceelbuur,” ayuu yiri Bilish oo ka mid ah geesiyaasha u guntaday inuu dalka ka xoreeyo khawariijta
Ciidanka qaranka iyo shacabka Soomaaliyeed ayaa uga mahad celiyey culimadda bayaanka ay kasoo saareen kooxda khawaariijta iyagoo sidoo kalena ugu baaqay in ay si toos ah uga qayb qaataan dagaalka dalka looga xoraynayo kooxda khawaariijta.
