Muqdisho(SONNA):-Doorka reer Jubbaland ee dagaalka Khawaarijta (Warbixin
Dagaalka ka dhanka kooxda khawaariijta ayaa gelaya wejigii labaad ee dib u xoraynta deegaanada jubaland halkaas oo laga bilaabayo hawlgalka wejigiisa labaad oo kooxda khawaariijta looga sifaynayo dhamaan deegaanada ay kaga sii harsan yihiin degmooyinka dowlad goboleedka jubaland,Madaxweynaha Jamhuuriyadda Federalka Soomaaliya Mudane Xasan Sheekh Maxamuud oo uu wehlinayo Madaxweynaha Dowlad-gobolleedka Jubaland Mudane Axmed Maxamed Islaam ayaa guddoomiyey shirka Golaha Wasiirrada Dowlad-goboleedka Jubaand kaasi oo lagaga arrinsaday dib u xoreynta deegaanada ay weli kusii gabanayaan kooxaha Khawaarijta ee ay ku dhibaateynayaan shacabka Soomaaliyeed.
Kooxda khawaariijta oo lagu soo jabiyey gobolada Hiiraan,Shabeellaha dhexe,Mudug iyo Shabeellaha hoose ayaa firxadkoodii waxa ay u baxsadeen degmooyin ka tirsan gobolada Jubbooyinka oo ka tirsan dowlad gobolleedka Jubaland.
Madaxweynaha Dowlad Gobolleedka Jubaland Mudane, Axmed Maxamed Islaam (Axmed Madoobe), ayaa dhowaan booqasho iyo salaan ugu tagay ciidamada qalabka sida ee loo diyaariyay howlgalka dib u xorraynta deegaanada Jubaland,Madaxweynaha oo uu wehelinayay wasiirka Difaaca Dowladda Federaalka Soomaaliya mudane, Cabdulqaadir Maxamed Nuur iyo Taliyaha ciidanka xoogga dalka General Odowaa Yusuf Raage.
Wasiirka warfaafinta dowlad gobolleedka Jubaland mudane Saleebaan Maxamed Maxamuud oo la hadlay warbaahinta qaranka ayaa sheegay ayaa sheegay in hawlgalka si xooggan loo qorsheeyey sidoo kale shacabka reer Jubaland si weyn ugu diyaar garoobeen sidii ay u gacan siin lahaayeen ciidamda qaranka”wax aan samaynay wacyigelin xooggan oo la xiriirta la dagaalanka khawaariijta,intii aan samaynay wacyigelinta waxa ka dhalatay in lagu dhiirado la dagaalanka khawaariijta sidoo kale waxa ka dhalatay in shacabku soo sheegaan khawaariijta” ayuu yiri wasiirka.
Wasiir saleebaan ayaa sheegay in shacabka soo sheegaan dhagarqabayaasha soo gala magaalada 7 bisha waxa la qabtay shabakad dhagarqabayaal khawaariij ah kuwaas oo ahaa kuwa miinooyinka aasa iyo kuwa bistooladaha wax ku dila,shacabka ayaana gacanta ugu weyn ka geystay fashilinta dhagarta shabakadan la fashiliyey.
