Muqdisho(SONNA):-Qurbejoogta Soomaaliyeed waxay bulshadda Soomaaliyeed ugu jiraan kaalin muhiim ah,hore xiliyada abaarraha,ama ay dhacaan aafooyinka dabiiciga ah waxa gurmadka iyo garab istaaga ugu weyn laga heli jiray qurbejoogta Soomaaliyeed,sidoo kale waxa ku tiirsan qurbejoogta Soomaaliyeed nolosha kumanaan qoys iyo waxbarashadda kumanaan caruur Soomaaliyeed ah.
Maanta iyo doorka ay qurbejoogta ku leedahay dagaalka dalka looga xoraynayo kooxaha khawaariijta,qurbejoogta Soomaaliyeed ayaa door weyn kaga jira halganka ka soconaya gobolada dalka iyo deegaanada ay weli kusii dhuumanayaan kooxaha khawaariijta.
Qurbejoogta ayaa dhowr hab uga qayb qaatay dagaalka dalka looga xorraynayo iyagoo qayb ka ah in shacabka Soomaaliyeed la abaabulo laguna abaabulo sidii dalka looga xorreyn lahaa kooxaha khawaariijta.
Dhowaan culimadda Soomaaliyeed ee ku nool qurbaha ayaa taageeray qorshaha dib u xoraynta dalka iyagoo kasoo saaray bayaan cadaynaya in kooxaha khawaariijta af iyo gacan ba la isaga xoreeyo,sidoo kale shirweynaha culimadda Soomaaliyeed oo ka dhacay magaaladda Muqdisho ayaa waxa kasoo qayb galay culimo Soomaaliyeed oo isaga kala timid daafaha dunida kuwaas oo cadeeyey khawaariijta iyo waxa ay diinteena suuban ka qabto ayna waajib tahay in lala dagaalamo kooxaha khawaariijta.
Halgamaa Yoonis waa qurbejoog kasoo kicitimay dalka Ingiriiska si uu uga qayb galo halganka dagaalka ee dalka looga xoraynayo kooxda Khawaariijta” aniga oo nolol haysta kuna nool qurbaha wax aan u imid in aan xorowno oo ka xor ka noqono kooxda Khawaariijta iyo fikradahooda khaldan,intaas ayaa i keentay dalkayga maantana wax aan diyaar u ahay innaan u dhinto dalkayga anigoo raadinaya dowladnimo waarta” ayuu yiri Yoonis.
Yoonis ayaa sheegay in deegaanadda uu soo maray uu kusoo arkay wax ka baxsan nolosha aaddanaha taas oo ah in kooxda khawaariijta ay dhibaato ba’an u geysteen shacabkii ku noolaa deegaanada” waxay dhaceen xoollihii dadka,waxay dileen waxgaradkii deegaanka waxay xireen goobihii adeegyadda bulshada” ayuu yiri Yoonis.
July 24-keedii 2019 Qarax ka dhacay xarunta gobolka Banaadir oo sababay dhimashada guddoomiyihii gobolka Banaadir iyo hawlwadeeno ka tirsanaa gobolka Banaadir ayaa dadkii ku shihiiday waxa ka mid ahaa Yoonis Aabihii oo dalka Maraykanka uga yimid in uu dalkiisa u shaqeeyo.
Madaxweyne Xasan Sheekh Maxamuud oo ka qayb galay kulan jaaliyadda qurbejoogta Soomaaliyeed ku qabteen dalka talyaaniga ayaa ku dhawaaqay qorshaha hal dollar ku daafac dalkaaga,qorshahan ayaa ah mid muwaadiniinta Soomaaliyeed kaga qayb qaadanayan sidii muwaadiniinta Soomaaliyeed meel kasta oo ay joogaan kaga qayb noqon lahaayeen dib u xorraynta.
Madaxweynaha ayaa kulan baaq ugu diray qurbejoogta soomaaliyeed ee ku kala nool daafaha dunida iyadoo qurbejooga isla goobta kaga dhawaaqeen in ay ajiibeen baaqa madaxweynaha kaalin muuqatana si weyn uga geysan doonaan halganka dib u xoraynta dalka.
