Muqdisho.( SONNA):- Wakiilo ka kala socda dalalka Soomaaliya, Qatar, Imaaraadka Carabta, Turkiga, UK iyo Mareynkanka oo kullankoodii saddexaad ku yeeshay magaalad Dooxa ee caasimadda Dalka Qatar ayaa waxay ka wada hadleen xaaladda Soomaaliya gaar ahaan dhinnacyada amniga, siyaasadda iyo arrimaha Bini-aadamnimada.
Kulanka oo dhacay isniintii shalay, ayaa saaxiibada kulmay waxay hoosta kaga xariiqeen arrimo badan oo muhiim ah oo ay ugu weyn tahay isku xirka dagaalka lagu ciribtiriyo kooxaha Khawaarijta argagixisada ah iyo kaalmada caalamiga ah ee dhinaca amniga.
Sidoo kale, Saaxiibada caalamka ayaa sheegay in Dowladda Soomaaliya ay ku taageerayaan horumarka amniga iyo xasilloonida, waxaa kale oo kullanka looga dooday sidii kor loogu qaadi lahaa kalsooni dhiska iyo xoojinta hay’adaha Dowladda.
Waxa ay soo dhoweeyeen ka go’naanta dowladda Soomaaliya in ay xoojiso hay’adaheeda amniga, u diyaar garowga in ciidanka qaranka ay amniga si buuxda ugala wareegeen hawlgalka Midowga Afrika marka la gaaro bisha December 2024, si loo gaaro dhameystirka hawlahahan, waxa ay isku raaceen waddamada kulmay wafuudooda in ay xoojiyaan isku-duwidda dedaaalkooda, sidoo kalena la shaqeeyaan Dowladaha iyo hay’adaha kala ee caalamiga ee saaxiibka la ah Soomaaliya.
Waxa ay ka doodeen muhiimadda ay leedahay in dhammaadka sannadka ay isugu yimaadaan shir lagu dejinayo qorshe amni oo la xiriira sida loo joogteynayo amniga kadib sannadka 2024, sidoo kale, saaxiibada waxay falabqeyn kooban ku sameeyeen ahmiyadda ay leedahay hubinta xasilloonida waarta iyo wanaag laga hirgeliyo deegaannadii laga dhawaan laga xoreeyay Khawaarijta Al-shabaab iyo sida ay uga go’an tahay saaxiibada caalamiga ah isku- duwidda kaalmo lagu xasilinayo deeganadaasi oo ah mid ay dowladda Soomaaliya hoggaamin doonto.
Dowladda Federaalka Soomaaliya waxay balan qaaddey in ay sameynayso lana wadaagayso saaxiibada taageera hannaanka isku duwidda dedaalada xasilinta Soomaaliya.
Saaxiibadda waxa ay taageereen in Golaha wadatashiga Qaranka kordhiyo dadaalada dib u heshiisiinta siyaasadda iyo in la kala xadeeyo mas’uuliyaadka hay’adaha dowladda si loo hubiyo xasiloonida Soomaaliya .
Ugu dambeyntii, Dalalka Qatar, Turkiga, Imaaraadka Carabta, Mareynkanka iyo UK ayaa isla qiray horumarka laga sameeyay dhinaca dhaqaalaha Soomaaliya iyo dib u habeynta hay’adaha maaliyadda, waxayna qireen in dhabbaha lagu socdo Soomaaliya uu gaarsiin karo in laga cafiyo daymaha iyo in la helo qorshe dhaqaale oo lagu horumariyo dalka, dayn cafinta kadib.
