Muqdisho, (SONNA): Koox ka tirsan ciidamada Jubaland oo uu si qaldan u isticmaalay hogaamiyihii hore ee Jubbaland, Axmed Madoobe, ayaa Subaxnimadii hore ee saakay weerar ku qaaday fariisin ay ku sugnaayeen Ciidanka Xoogga Dalka Soomaaliyeed iyo Daraawiishta Jubaland, sida ay shaacisay Wasaaradda Gaashaandhigga Soomaaliya.
Fariisinka la weeraray ayaa ahaa mid ay ciidamada qaranka ku sugnaayeen si ay ula wareegaan saldhigyo hore uga baxay ciidamada nabad-ilaalinta ee ATMIS, iyaga oo sidoo kale isku diyaarinayay hawlgallo ka dhan ah kooxda Khawaarijta Al-Shabaab.
Wasaaradda Gaashaandhigga ayaa sidoo kale sheegtay inay si dhow ula socdaan qorshe uu Axmed Madoobe xiriir kula sameeyay Khawaarijta, tallaabadan ayaa lagu tilmaamay inay fududeysay in kooxaha uu soo abaabulay ay si xor ah ugu dhex maraan maleeshiyaadka Khawaarijta.
Wasaaradda ayaa ku adkaysatay in ficilada noocan ah ee Qaran-dumiska ah aysan sii socon doonin, isla markaana ay ku mutaysan doonaan ciqaab adag oo sharci ah.
