Muqdisho,(SONNA):- Ciidamada Xoogga Dalka iyo kuwa dib-u-xoreynta deegaanka ayaa howlgall gaar ah ka fuliyay dhulka howdka ah ee u dhaxeeya gobollada Galguduudย iyo Shabeellaha Dhexe, howlgalkaas oo ahaa mid lagu baacsanayay haraadiga kooxda Khawaarijta Al-shabaab.
Saraakiisha ciidamada Dowladda ee howlgalka hoggaaminayay ayaa warbaahinta qaranka kula hadlay duleedka deegaanka Maraay-Suuleey, halkaas oo ay maleeshiyaad ka tirsan argagixisada in muddo ku dhuumaaleysanyeen.
Sidoo kale, waxaa kooxda naflacaariga ah laga saaray dhul howd ah oo muddo ay ku jireen, halkaasina dadka shacabka dhibaato ba’an ugu geysaneysay.
Taliyaha Guutada 17-aad, Kumaandooska Gor-Gor, Saahid Jaamac Faarax, taliyaha Guutada Khaalid Bini Waliid Mukhtaar Xasan Tifow Shaah Macabe iyo Khaliif Cumar Macallin Nuur oo howlgalladan hoggaaminayay ayaa warbaahinta kula hadlay deegaanka Cidda-Kuus oo hoostaga deegaanka Ceeldheer ee gobolka Galgaduud.
Saraakiishan oo warbaahinta la hadlay ayaa sheegay in Al-shabaab laga saaray deegaannada Hilowle-Gaab, Marey Suuleey, Cad-Caddeey, Baraag-Sheekh Caamir iyo sidoo kale, degmada Runir-Good oo in muddo Khawaarijtu ku sugneyd kana soo duulaan tegi jirtay.
Gaashaanle, Saahid Jaamac Faarax oo ugu horeyn warbaahinta la hadlay ayaa sheegay inuu sugan yahay amniga deegaannada laga xoreeyay argagixisada, wuxuuna carabka ku adkeeyay firxadkooda halka uu sii marayo.
”ย Howdkan oo ay ku dhuumaaleysanayeen Khawaarijta ayaannu ka saarnay, Ilaahey waa noo fududeeyay inaan howdka soo nadiifino, iyaga nooma babac dhigi karaan oo waa iska carareen, waanu daba joognaa waanu dabagaleynaa kama hareyno ilaa meesha ugu dambeyso oo gacanta ugu soo dhigno,”.
Dhanka kale, Khaliif Cumar Macallin Nuur oo warbaahinta kula hadlay warbaahinta qaranka ayaa sheegay in ay Khawaarijta ka saareen dhowl howd ah oo u badan halkii gabaadka ka dhigan jireen maleeshiyada iyo horjoogayaasha u baraaray gumaadka shacabka.
” Alle Mahaddii waxaa maanta inoo suurta gashay in ragga sida Efendariga u shaqeynayay Al-shabaab ugu galeen dhulka howdka ah kana saaraan dhul ballaaran, sida aan isku ogeyn waa guul ama geeri inshallah,” ayuu yiri geesi qaran Khaliif Cumar Macallin Nuur.
Wejiga labaad ee dagaalka ka dhanka ah Khawaarijta ee la doonayo in Dalka looga xoreeyo ayaa hadda si rasmi ah u bilowday, waxayna argagixisadu bilaabeen durba in ay kala firxadaan oo deegaannada qaar oo geesiyaashu qaranka ku wajahan yihii maleeshiyada naflacaariga ah ka sii cararaan.
Madaxweynaha Jamhuuriyadda Federaalka Soomaaliya Mudane Xasan Sheekh Maxamuud ayaa sheegay in wejiga koowaad ee dagaalka lagu soo gabo-gabeyn doono degmada Ceelbuur, halkaasina lagaga dhawaaqi doono wejiga labaad ee dagaalka ka dhanka ah Khawaarijta oo bilaabanaya haddana qeyb ka mid ah ka socdaan maamulada Jubbaland iyo Koonfur Galbeed.
