Xudur (SONNA) – Xaflad lagu muujinayey ahmiyadda uu dalka u leeyahay Manhajka Cusub ee ay soo diyaarisey Dowladda Soomaaliya ayaa lagu qabtay magaalada Xuddur ee xarunta Gobolka Bakool.
Xafladaan oo ay soo qaban qaabiyeen Waaladiinta iyo Maamulayaasha Iskuulada Degmada Xuddur ayaa waxaa ka soo qeyb galay bahda Waxbarashada, Maamulka Gobolka iyo kan Degmada, culumaa’udiin, aqoonyahanno iyo martisharaf kale, waxaana intii ay socotay laga shekeeyey tayadii Waxbarasho ee dalkani uu lahaan jirey iyo muddadii 30-ka sano aheyd tayadii waxbarasho oo meesha ka baxday, taasoo sababtay in manaahiij kala duwan dalka lakeeno oo da’yartii waxbaratay taariikhdii dalka waxba kala socon.
Ugu horey waxa xafladda ka hadlay Guddoonka Waxbarashada Degmada Xuddur Adan Axmed Maxamuud (Qoosh) wuxuna sheegey in Manhajka cusub uu bedelayo jahwareerkii waxbarasho ee dalkani dib u dhigey.
Waalidiintii xafladda ka hadashay ayaa aad ugu riyaaqey Manhajka cusub, waxayna sheegeen in tani ay ka turjumeyso mid ka mid ah astaamaah Qaran ee uu dalku leeyahay.
Maamulayaasha Iskuulada ayaa codsaday in sida manhajka loo tayeeyey, macalimiintana loo tababaro si waxbarashada dalka ay u noqoto mid tayeysan oo isku dheeli tiran dhinac kasta.
Guddoonka waxbarashada Gobolka Bakool Cabduqaadir Nuur Cadow ayaa Wasaaradda Waxbarashada ee Xukuumadda Federaalka Soomaaliya uga mahadceliyay dhibaatada dalka ka jirto iyo dadaalka badan ay gelisey in manhajkii lahelo.
Wardheere Axmed Cabdi oo ah xubin ka tirsan Golaha Deegaanka Degmada Xuddur ayaa sheegey in isaga iyo carruurtiisa ay isla dhiganayaan Jaamacadda Princeton International University.
Guddoomiyaha Degmada Xuddur Maxamed Macalin iyo Guddoomiye Ku-xigeenka Gobolka Bakool Cabdulaahi Maxamed Nuur ayaa waxay bulshada kula dardaarmeen in iskuulada dowliga ah oo manaahijta lagu dhigo ay geeyaan carruurtooda si ubadka ay u helaan waxbarasho lacag la’aan ah.
