Muqdisho(SONNA): howlgal qorsheysan oo dhinaca cirka ah oo ujeedkiisu ahaa burburinta koox ka tirsan khawaarijta Daacish ( ISIS ) ayaa Taliska Ciidamada Mareykanka ee Afrika (AFRICOM) oo la kaashanayo Dowladda Federaalka Soomaaliya waxa uu ka fuliyay gudaha Soomaaliya, si loo beegsado dhaqdhaqaaqyada kooxda.
Duqeyntan ayaa ka dhacday meel qiyaastii 70km Koofur bari u jirta magaalada Boosaaso ee gobolka Bari ee dowlad goboleedka Puntland ee Soomaaliya.
Howlgalka oo wali socda awgeyd, waxaa lagu howlan yahay uruurinta macluumaadka qasaaraha gaaray cadowga iyo dhameystirka hadafka howlgalka oo ah taageerada howlgalka Ciribtirka khawaarijta Daacish oo ay wadaan Ciidanka Daraawiishta Puntland.
Dowladda Federaalka Soomaaliya waxay bogaadineysaa iskaashiga dhow ee ay la leedahay saaxiibada caalamiga ah, gaar ahaan Mareykanka, si loo xaqiijiyo nabadda, xasilloonida, iyo la dagaallanka kooxaha argagixisada ee khatar ku ah dalka iyo gobolka.
-DHAMMAAD-
