Madaxweynaha Iran Ebrahim Raisi iyo Dhaxal-sugaha Sacuudiga Maxamed Bin Salmaan (MBS) ayaa khadka taleefoonka uga wada hadlay dagaalka u dhaxeeya Israa’iil iyo Xamaas.
Labada hoggaamiye ayaa ka wada hadlay baahida loo qabo in la soo afjaro dembiyada dagaal ee ka dhanka ah Falastiin,sida uu ku waramay kaaliyaha arrimaha siyaasadda ee madaxweynaha Iran Mohammad Jamshidi.
Wakaaladda wararka ee dawladda Sucuudiga ee SPA ayaa sheegtay in dhaxalsugaha uu muujiyay walaac ku aadan xaaladda bini’aadantinimo ee Gaza iyo saamaynta dagaalka ee dadka rayidka ah.
Dhaxal sugaha Boqortooyada Sacuudiga ayaa sidoo kale sheegay in Boqortooyada ay dadaal ku bixineyso la shaqeynta dhammaan dhinacyada caalamiga ah iyo kuwa gobolka si loo joojiyo xiisadda ka taagan Gaza.
Wadahadallada labada hoggaamiye ayaa yimid xilli Israa’iil ay duqeymo xagga cirka ah ka waddo Gaza, ka dib weerarradii badnaa ee Xamaas ay ka geysatay gudaha Israa’iil dhammaadkii isbuucii hore.
