Muqdisho.(SONNA):- Waa sheekada beer ka mid ah beeraha waa weyn ee ku yaalo xadka labada gobol ee shabeellaha dhhexe iyo Shabeellaha hoose,
Halkan bilooyin ka hor, maleeshiyada kooxda Khawaarijta ayaa ugu yeeri jirtay ama ku balamin jiray ganacsatada Soomaaliyeed si ay uga qaadaan lacago ay ku soo iibiyaan qaraxyo ay ku gumaadaan shacabkeenna.
Maanta waxaa beerta ka socda wax ka duwan wixii bilo ka hor ka socday, waxaa dalxiis u yimaada shacabka Soomaaliyeed, ayadoo sidoo kale, habeen iyo dharaar howlgallo amni xaqiijin ah ay ka sameeyaan ciidamada qalabka sida ee Soomaaliya si aysan marna u dhicin in cadow ku soo dhuunto, maaddaama sanado badan argagixisadu u ahayd goob ay dadku ku baadaan.
Mid ka mid ah guulaha wax ku oolka ah ay gaartay Dowladda Federaalka ee Soomaaliya ayaa ah in bilo kooban gudahooda maleeshiyada lagu baacsado duur walba, halka bilo ka hor iyagu shacabka Soomaaliyeed farta ugu yeeri jireen halkii ay doonaan, kuna baadi jireen.
Halkan ay ciidanada nabad sugidda iyo sirdoonka qaranka ay gaaf-wareegayaan ayaa bilo ka hor waxay ahayd goob ay ku dhiig-miiran jireen argagixisada ganacsatada iyo shacabka kale ee ku safraya wadadda xiriirisa waddadaas, waxaana hadda su buuxda ula wareegay ciidamada qalabka sida, kuwaas oo shacabka si diiran ay u soo dhoweeyeen.
Argagixisada oo hadda gabalkooda sii dhacayo ayaa muddo 15-sano ka badan gumaadayay shacabka Soomaaliya, ayagoo marna dhiiggiida banneysanayay marna lacago baad ah xoog uga qaadayay.
