Ciidanka xoogga dalka ayaa manta mas’uuliyadda amniga ee degmada Afgooye kala wareegay ciidamada AMISOM ee howlgalka Midowga Afrika,ka dib markii xaflad lagu maamuusaayo munaasabaddaasi lagu qabtay degmada Afgooye ee gobolka Shabeelaha hoose,
Xafladdaasi waxaa ka qeybgalay, saraakiil uu kamid yahay taliyaha ciidanka dhulka, janaraal Maxamed Tahliil Biixi, ku xigeenka taliyaha AMISOM, taliyaha qeybta 12 Abrill ee xoogga dalka, guddoomiyaha gobolka Shabeelaha hoose iyo mas’uuliyiin kale.
Taliyaha ciidanka dhulka janaraal Tahliil ayaa sheegay in ay ku faraxsan yihiin in maanta ay AMISOM kala wareegaan amniga degmada Afgooye, isagoo AMISOM ugu mahad celiyay gacantii ay ku laaheeyn sugidda ammaanka Soomaaliya.
General Shume, ah ku xigeenka howlgalka Midowga Afrika ee Soomaaliya AMISOM ayaa sheegay in talaabadan ay ku jirtay qorshaha kala guurka oo dhigayay in ciidanka xoogga dalka ay la wareegaan mas’uuliyadda ammaanka.
Dowladda Soomaaliya ayaa dadaal badan ku bixisay sidii tababar iyo qalabeyn loogu sameyn lahaa ciidanka xoogga dalka Soomaaliyeed si ay ula wareegaan mas’uuliyadda ammaanka dalka.
